АНУ-ын 2024 оны ерөнхийлөгчийн сонгууль Лхагва гаригийн орой дуусч, Дональд Трамп ялалт байгуулсан. Эл мөчөөс эхлэн олон орны төр засгийн тэргүүн нар түүнд баярын зурвас илгээж байв. Хамгийн сонирхол татахуйц нь Украины ерөнхийлөгч Володимир Зеленскийн баярын мэндчилгээ байсан гэж хэлж болно. Учир нь сонгуулийн кампанит ажлынхаа хүрээнд Трамп "Дайныг санхүүжүүлэхгүй, Украинд үнэгүй зэвсэг өгөхгүй" гэх утга бүхий илтгэл тавьж байсан юм. Үүний дагуу олон улсын шинжээчид төдийгүй Киевийн удирдлагууд Трампийн дараагийн алхмаас эмээж байв.

Зеленский "X" платформ дээр Дональд Трампт баяр хүргэсэн тухайгаа нийтэлсэн. Үүнд "Дональд Трампийн шийдэмгий удирдлага дор АНУ хүчирхэг эрин зуунд ойртох болно. Түүний хүчирхэг байдлаар дамжуулан энх тайвныг дэлхий дахинд тогтоох болсонд би талархаж байна. Яг энэ зүйл л Украинд энх тайвныг бий болгож чадна. Үүнийг хамтран бий болгож чадна гэж найдаж байна" гэжээ.

Тэрбээр "Бид хамтын ажиллагаагаа урагшлуулахын тулд хэлэлцээр хийхээр болсон. АНУ-ын хүчирхэг, гуйвшгүй манлайлал нь дэлхийн шударга ёс, энх тайвныг тогтоох амин чухал зүйл юм" гээд удаа дараа АНУ ямар чухал болохыг онцолсон юм.  Өнгөрсөн хугацаанд Украинд зогсолтгүй тусламж үзүүлж байсан АНУ-ын цаашдын байр суурь Трампийн засаг захиргааны үед хэрхэн өөрчлөгдөх нь таамаг хэвээр байна. Украин 2022 оны эхээр Оросын Киевийн захад хийсэн дайралтыг няцааснаас хойш Москва зэвсгээ сайжруулж эхэлсэн. Мөн энэ оны дунд үед Киев Оросын газар нутагт анхны дайралтаа хийж хурцадмал байдал нэмэгдсэн юм.

Гэсэн хэдий ч Трамп зууван танхимд сууж эхэлснээр дайныг зогсоох хэлэлцээр зохион байгуулж магадгүй юм. Украины улс төр судлаач Володимир Фесенко хэлэхдээ, "Трамп дайныг зогсоохын тулд хурдан шуурхай хэлэлцээ хийхийг завдаж магадгүй. Гэхдээ тодорхой хэмжээний буулт хийнэ. Буулт хийх зүйлс нь Москвагийн шаардлагаар байна гэж бодохгүй байна. Энэ нь АНУ-ын хувьд ялагдал мэт байх учир Трамп хэзээ ч тэдний хүссэн зүйлийг өгөхгүй" гэжээ.

Сөрөг хүчин “Холос” намын хууль тогтоогч Ярослав Железняк “Телеграм” хуудаснаа "Трамп нэгдүгээр сард тангараг өргөх хүртэл хугацаа нь Байдены хувьд зоригтой алхам хийх ‘цонх’ юм" гэжээ. Харин парламентын зэр зэвсгийн асуудал эрхэлсэн комиссыг тэргүүлдэг хууль тогтоогч Олександра Устинова хэлэхдээ, "Трамп батлан хамгаалах, аюулгүй байдал, дипломат харилцааны салбараа хэнд даатгах нь дайнд АНУ хэрхэн нөлөөлөхийг харуулах болно" гэсэн байна.  Мөн "Энэ хүмүүс л Украины ирээдүйг шийдэх юм. Одоогийн байдлаар Трамп Батлан ​​хамгаалахын нарийн бичгийн даргаар Майк Помпеог томилох төлөвтэй байна. Помпео нь Украины найз гэж хэлж болно. Мэдээж хэрэг хүн бүр өөрчлөлтөөс эмээж байгаа ч аль ч намын нэр дэвшигч ерөнхийлөгч болсон бай өөрчлөгдөх л болно. Одоо бид нэг л зүйлийг хүлээх үлдлээ. Энэ нь ямар ч аргаар хамаагүй дайныг зогсоох юм" гэжээ.