Хойд Солонгосын баруун хойд хэсгийн Пёнган муж өнгөрсөн зун үерт автсан. Үерт нэрвэгдсэн бүс нутагт их өөрчлөлтийн шинэ түүхийг бичиж буй ажилтнуудад удирдагч Ким Жон Ун бэлэг гардууллаа. Тэрбээр энэ сарын 4, 5-ны өдрүүдэд Хойд Пёнган мужид айлчлав. Үүний зэрэгцээ Ким Жон Ун ажилчдын эрүүл мэндэд байнга анхаарч, амьдрах нөхцлийг нь сайжруулах арга хэмжээ авч байгааг "KCNA Watch" мэдээллээ.

Бэлэг гардуулах арга хэмжээнд тус улсын Хөдөлмөрийн намын төв хорооны нарийн бичгийн дарга Жо Ён Вон, Ри Ил Хван, Пак Тхэ Сонг нар, Хойд Пёнган мужийн эрх баригчид болон сэргээн босголтын штабын удирдах ажилтнууд, барилгачид байлцав.

Үерт нэрвэгдсэн мужийн сэргээн босголтын ажилд 130 мянган цэрэг дайчлана гэж тухайн үед Ким Жон Ун мэдэгдэж байв. Мөн хохирсон иргэдийг нийслэл хотод үнэ төлбөргүй байраар хангана гэж байжээ. Үерт нэрвэгдэгсдэд байшин барих, засварлах ажил дууссаны дараа мужийн нөхцөл байдал тогтворжиход дор хаяж хоёроос гурван сар шаардлагатай гэж тооцоолсон. Өдгөө үерээс хойш дөрвөн сар өнгөрөөд байна.