“Оюутолгой” ХХК-ийн Төлөөлөн удирдах зөвлөл /ТУЗ/-ийн гишүүнээр Э.Мэндтүвшинг томилохоор тохирчээ. Түүний аав нь Гадаад харилцааны сайд асан Энхтайван бөгөөд Э.Мэндтүвшин нь хуульч мэргэжилтэй.

“Оюутолгой” ХХК-ийн ТУЗ-ийн гишүүн Ж.Тана үүрэгт ажлаа хүлээлгэн өгсөн бөгөөд ийнхүү түүний оронд Э.Мэндтүвшинг томилохоор ярилцаж, удахгүй Засгийн газрын хуралдаанаар хэлэлцэх юм байна.

"Оюутолгой" компанийн ТУЗ-ийн гишүүн Ерөнхийлөгч асан Н.Багабанди олон жил ажилласан бөгөөд түүнийг 2023 онд чөлөөлж, оронд нь Засгийн газар урилгаар Ж.Таныг томилж байсан билээ.

Э.Мэндтүвшин нь хуульч мэргэжилтэй бөгөөд Харвардын хуулийн сургуулийн магистр, АНУ-ын олон улсын хуулийн фирмд хуульчаар ажиллаж байсан намтартай. Түүнээс гадна эрх мэдэл, албан тушаал, мэдээлэд ойр байдлаа ашиглаж Боловсролын зээлийн сангаас зээл аваад түүнийг төлөөгүй дуулиан гарч байхад Э.Мэндтүвшингийн нэр яригдаж байв.

Гадаад харилцааны сайд асан Н.Энхтайваны хүү Мэндтүвшин 2015 онд АНУ-ын Харвардын их сургуульд хуулийн чиглэлээр магистрын хөтөлбөрт 1.5 жил суралцахаар 24 мянган ам.долларын зээл авсан.

Зээлийн нөхцөлд "Төгсч ирээд дээд боловсролын санхүүжилт, суралцагчдын нийгмийн баталгааны тухай хуулийн 8.8-д заасан журмын дагуу зээлийг эргэн төлж барагдуулна" гэж заасан бөгөөд дуулианы үеэр зээлээ төлж байгаа гэсэн мэдээлэл гарч байсан юм. Улс төрийн хамаарлын хувьд түүнийг УИХ-ын гишүүн О.Батнайрамдалтай тун ойр нөхөрлөж, “харвард” фракцид харьяалагддаг гэх бөгөөд нэгэн цагт Ховдоос Харвард хүрсэн лекцэнд нь ч өөрийн туршлагаа хуваалцаж явжээ.

"Оюу толгой" ХХК-ийн ТУЗ нь есөн гишүүнтэй бөгөөд ТУЗ-ын даргаар Шон Хинтон томилогдон ажиллаж байгаа.  Харин гишүүдээр Дэйрдрэ Лингенфэлдер, Крейг Стэгман, Морита Сүтэджа, Стив Тибоу, Н.Цэрэнбат, Э.Баясгалан, С.Мөнхсүх нар ажиллаж байгаа юм.

Т.ОД