Улаанбаатар хотын түгжрэлийг бууруулах зорилгын хүрээнд 2016 онд, Засгийн газраас Нийслэлийн Засаг даргын Тамгын газрыг Яармаг руу нүүлгэх шийдвэр гарсан. Улмаар Засаг даргын Тамгын газар 2024 наймдугаар сарын 8-ны өдөр бүрэн бүрэлдэхүүнээр Яармагт байрлах "Шинэ Хангарди" ордон руу шилжин нүүсэн талаар Нийслэлийн Засаг дарга Х.Нямбаатар мэдээлсэн юм.

Тэгвэл арваннэгдүгээр сарын 8-наас эхлэн "Яармагийн I автобусны буудлын нэршлийг "Хангарди цогцолбор" болгож өөрчлөхөөр болсон талаар Нийтийн тээврийн бодлогын газраас мэдээллээ.

Нийтийн тээврийн бодлогын газраас уг шийдвэрийн талаар "Нийслэлийн Засаг даргын Тамгын газар болон Нийслэлийн нутгийн захиргааны байгууллагуудыг нийслэлийн Хан-Уул дүүргийн 4 дүгээр хорооны нутаг дэвсгэрт шинээр баригдсан “Нийслэлийн нутгийн захиргааны цогцолбор” барилгад нүүлгэн шилжүүлсэнтэй холбоотойгоор иргэдэд төр захиргааны үйл ажиллагааг ойртуулах, ойлгомжтой байлгах зорилгоор өөрчилсөн" гэх тайлбар өглөө.