УИХ-ын Төсвийн байнгын хорооны өнөөдрийн /2024.11.05/ хуралдаанаар Монгол Улсын 2025 оны төсвийн тухай хуулийн төслийн гурав дахь хэлэлцүүлгийг хийх үеэр УИХ-ын гишүүн Н.Алтанхуяг хуралдааныг удирдаж буй Ц.Даваасүрэн даргыг "Дэг барина" нэрийдлээр үг хэлэх боломж олгохгүй байсанд уурсан, хуурай “агсам” тавив.

Тэрбээр “Ц.Даваасүрээн над үг хэлэх боломж олгоч чи. Үг хэлсэн болгоныг жадлан эсэргүүцдэг чи. Яасан их дэг барьдаг юм, та нар. Та нар дэг барих ёстой юм уу, Монголын ард түмний ахуй амьжиргааг дээшлүүлж, аж ахуй нэгжүүдээ хөл дээр нь босгож, улс орноо хөгжүүлэх ёстой юм уу. Эсвэл дэг барьж байна гээд хүмүүсийн амыг хаагаад сууж байх ёстой юм уу. Ийм олон гишүүн эсэргүүцэж байхад хүчиндэж байгаад, одоо бол эцсийн хэлэлцүүлэг, эцсийн үг ч байхгүй. Ийм юм байдаггүй юм.

Ц.Даваасүрэн дарга уг нь манай талд байсан юм, одоо дайсны талд орчихож. Уг нь төсвийн хэлэлцүүлэг эхлэхэд манай талд байсан ш дээ. “Нээрээ хэдүүлээ төсвөө гоё болгоё, засъя, янзалъя.  Ард иргэн, аж ахуй нэгжүүдийнхээ амьдралыг гоё болгоё” гэсэн. Одоо байхгүй. Одоо ийм тоглоомын юмаа болимоор байна. Би сая ирц гүйцээх үү яах уу. Б.Жавхлан орж ирсэн байна. Та нарыг өөр юм ярих байх гэж бодож орж ирсэн. Дөрвөн гишүүний саналын дагуу төсвөө татаж аваад наанатай цаанатай зарим юмыг нь хасчихая гэж бодсон” гэв. Цааш ярих гэсэн боловч үг хэлэх минут нь дууссан юм.

УИХ-ын Төсвийн байнгын хорооны дарга Ц.Даваасүрэн “Минут дууслаа. Байнгын хорооны зүгээс гишүүдийн гаргасан хасъя гэсэн саналыг дэмжиж, чуулган руу оруулсан.  18.3 тэрбумыг хасъя гээд оруулсан ч чуулган дээр л боссон. Чуулганы тэр олон гишүүдийг би яаж ч чадахгүй шүү дээ. УИХ-ын дарга биш юм чинь. Манай байнгын хороо хасъя гээд л оруулсан шүү” гэж хариулт өглөө.

Монгол Улсын 2025 оны төсвийн төсөлд хүүхдэд үнэгүй үзвэр үзүүлэхэд зориулж 18.3 тэрбум төгрөг суулгасны зэрэгцээ зочны зардалд 111 тэрбум тавилга эд хогшил худалдах авах зардал 268 тэрбум төгрөг гэхчлэн үр ашиггүй зардлууд олноор суулгасныг УИХ-ын гишүүн Г.Тэмүүлэн, Д.Энхтүвшин нарын дөрвөн гишүүн эсэргүүцэж, Засгийн газар төсвийг буцаан татаж, урсгал зардлаас 3.6 их наяд төгрөгийг танах ёстой гэдэг асуудлыг тавьж буй. Гэвч төсвийн хэлэлцүүлэг эцсийн шатанд ирсэн гэх агуулгаар асуудалд хандаж буй нь зарим гишүүний уурыг барж, цухлыг нь өдөөгөөд байна.

Г.ХОРОЛ