УИХ-ын Төсвийн байнгын хорооны өнөөдрийн /2024.11.05/ хуралдаан үргэжилж байна. Энэ үеэр УИХ-ын гишүүн Н.Учралаас цаг үеийн асуудлаар тодрууллаа.

Тэрбээр "Уг асуудлыг сангийн яам өнгөрсөн хугацаанд санхүүжилтийн зээлийг хэлэлцээд явсан. Та бүхэн нэг зүйл дээр буруу ойлголттой байна. Энэ бол УИХ-д хэлэлцэж эхлээгүй асуудал. Францийн парламент хиймэл дагуулд зарцуул гэж өгсөн мөнгийг өөр зүйл зарцуулах үндэслэл байхгүй. Байхгүй мөнгөний төлөө бухимдаад намайг элдвээр хэлэх шаардлага байхгүй гэж бодож байна. Би төрийн олон жил гацсан төслүүдийг хариуцан ажиллаж байна. Үүний цаана олон хүний эрх ашиг байгаа. Улс төрд олон жил ажиллалаа. Надад хийж байгаа зүйлээсээ ухарч, няцах хувийн ашиг сонирхол байхгүй. Та нар тайван бай. Ирэх саруудад би хамгийн муу хүн болох нь ойлгомжтой боллоо. Монголын стратегийн орд газруудын 34 хүртэлх хувийг нь хуримтлалын дансаар дамжуулан ард түмний гарт өгнө. Ураны хөрөнгө оруулалтын гэрээ ч гэсэн Монгол нэг ч санхүүжилт хийхгүйгээр, ирээдүйд өр үүсгэхгүйгээр 34 хувийг шууд татвараар авъя л гээд байгаа юм. Төрийн ажил гэдэг ийм л зарчимтай. Парламент өөрөө надад мега төслөө танилцуул гэсний дагуу л танилцуулсан. Үүнийг болиулах шиг амархан зүйл байхгүй. УИХ-аар ерөөсөө зээлийн хэлэлцээр ороогүй. УИХ-аар шийдээгүй. Тэр байтугай УИХ-д өргөн бариагүй шүү дээ. Буруу ташаа мэдээлэл өгөөд байгаа хүмүүсийг ойлгож байна. Үүний цаана эрх ашиг нь хөндөгдөж байна шүү дээ. Олон жил хав дараад явж байсан юм нь яригдаад, ажил болох гээд байна. Энэ долоо хоногоос Баялгийн сангийн 34 хувийн хэлэлцээрийг эхлүүлнэ" гэв.

Мөн тэрбээр "Та УИХ-ын гишүүн Д.Энхтүвшинээс уучлалт гуйсан уу?" гэх сэтгүүлчийн асуултад "Их гомдомтгой хүн юм болов уу л гэж бодож байна. Би юу гэж уучлалт гуйх юм бэ. Зарчмын асуудал ярьж байгааг нь буруутгахгүй. Гэхдээ ТӨХК-ууд дээр бүр их асуудал байна үүнийг ярих хэрэгтэй. Хамтарч ажиллая" гэх хариулт өглөө.