Замын-Үүдийн боомт дээр ачааны автомашины урт дараалал үүсч, жолооч нар эсэргүүцлийн жагсаал зохион байгуулж байгаа тухай мэдээлэл цахим орчинд цацагдсан. Тодруулбал, Замын-Үүдийн боомтоор ачааны автомашин гарахад шаардлагатай D бичиг тасарсан, огт олгохгүй байгаа гэх асуудлаас ачааны автомашины жолоочид ийнхүү эсэргүүцэл зарласан аж.

Энэ талаар Автотээврийн үндэсний төвөөс тодруулахад "Ачааны автомашинд олгодог D бичгийг Хятад талаас олгодог. Энэ жилийн тухайд нийт 50 мянган ширхгийг олгосон боловч наймдугаар сарын дундуур дууссан. Тиймээс дахин авах хүсэлт гаргаж есдүгээр сард 3000 ширхэг, аравдугаар сард 3000 ширхэг, арваннэгдүгээр сард мөн 3000 ширхгийг нэмж авах байдлаар зохицуулсан. Энэ арваннэгдүгээр сард олгох 3000 ширхэг D бичиг хугацаанаасаа хоцорч ирсэн. Үүнийг энэ он дуустал өдөрт 50 ширхгийг олгох байдлаар зохицуулалт хийнэ. Гэхдээ үүнийг жолоочид хангалтгүй гэж үзэж байгаа учраас ийм нөхцөл байдал үүслээ. Түүнчлэн Хятадын талаас D бичгийг хязгаартай олгож байгаад шалтгаан бий. Авто тээврийн үндэсний төвөөс Засгийн газрын 362 дугаар тогтоолын дагуу хил нэвтрэх С зөвшөөрлийг олгодог байсан. Үүнийг 2023-2024 онд уурхай эзэмшигч компаниудад шилжүүлсэн. Гэвч уг тогтоол хүчингүй болоогүй байгаа. Тиймээс Хятадын тал үүнийг холбогдох журам зөрчсөн гэж үзсэн" гэв.

Жолоочдын хэлж буйгаар D бичиг олдохгүй удвал ачаа тээврийн үнэ огцом нэмэгдэж, аж ахуй нэгжүүд Хятадаас бараа материалаа татаж чадахгүй хүрэх эрсдэлтэй гэв. Мөн цахим орчинд зураг нь цацагдаад байсан эсэргүүцлийн жагсаал тарсан гэдгийг хэллээ.

 Замын-Үүд дэх автотээврийн үндэсний төвөөс "Замын-Үүд-Эрээн чиглэлд ачаа тээврийн үйл ажиллагаа эрхэлдэг иргэн, ААН-д 2024 оны 10-р сард хугацаа нь дууссан болон 11-р сар, 12 дугаар сард хугацаа нь дуусах С төрлийн зөвшөөрлийн бичиг 2024.12.31-ний өдрийг хүртэл хэвийн явна, 2024.11.05-ны өдрөөс эхлэн Д төрлийн зөвшөөрлийн бичгийг олгож эхлнэ" гэж мэдэгджээ.