Зэвсгийн үйлдвэрлэлд анхаарал хандууллаа гээд Оросын эдийн засаг дордохгүй гэдгийг ерөнхийлөгч Путин хэллээ. Тэрбээр "Улс орны батлан хамгаалах салбар нэн тэргүүлэх чиглэл мөн боловч энэ чиглэлийн стратегийн зорилтуудыг шийдвэрлэхдээ өмнөх алдаагаа давтахгүй, эдийн засгаа сүйрүүлэх ёсгүй" гэжээ.

Тэрбээр өнгөрсөн оны хоёрдугаар сард "Хүн бүхний мэддэг нэг үг бий: Цөцгийн тосны оронд буу" гэж хэлж байв. Тавдугаар сард ч бас "буу, цөцгийн тос"-ны харьцуулалтаа тэр давтсан билээ. Гэхдээ энэ удаад цэргийн зардал, иргэний зардал хоёрын аль нэгийг сонгох ёстой гэсэн үзэл баримтлалыг үгүйсгэж, аль алинд нь ижил тэнцүү анхаарал хандуулах ёстой гэсэн юм.

Дайн үргэлжилсээр байгаа тул Оросын эдийн засаг сүүлийн саруудад амаргүй байна. Засгийн газрын статистик мэдээ харвал аравдугаар сарын эцсийн байдлаар ОХУ-д цөцгийн тосны үнэ 2023 оны арванхоёрдугаар сартай харьцуулахад 25.7 хувиар өсчээ. Хүнс, тэр дундаа сүүн бүтээгдэхүүний үнэ ийм хурдацтай өсдөггүй. Харин хурганы махны үнэ 21.48 хувь, сүүний үнэ 12.75 хувиар өсч удаалжээ.

Хэрэглэгчийн долоо хоног тутамд худалдаж авдаг 104 нэр төрлийн барааны 84-ийнх нь үнэ өссөн болохыг эдийн засагчид онцолж байна. Ялангуяа цөцгийн тосны үнэ долоо хоног бүр 1.9 хувиар өсч буй нь өмнөх өндөгний түүхийг давтах вий гэсэн болгоомжлолыг үүсгэж байна. 2023 оны арваннэгдүгээр сард өндөгний үнэ 40 хувиар өсч байв.

Супермаркетуудаар цөцгийн тос хулгайлах явдал ч гарах болсныг Оросын хэвлэлд мэдээлж байна. Хоёр хүн нийлээд 25 хайрцаг цөцгийн тос хулгайлсан тохиолдол ч гарчээ. Тиймээс зарим дэлгүүр тусдаа хамгаалалттай хайрцагт цөцгийн тосоо хийж байна.

Дотоодын цөцгийн тосны хэрэглээний 25 хувийг гадаадын нийлүүлэгчдээс авч байгаа аж. Импортын дийлэнх хувийг Латин Америк эзэлдэг байсан бол хориг арга хэмжээнээс болоод бага зэрэг буурчээ.