The MongolZ баг шагналын орлогоороо дэлхийд 4-рт бичигдэв

Цахим спортын зах зээл тэлж, эргэлдэх мөнгөний хэмжээ нь тасралтгүй өсч байна. Тэмцээн уралдаан ч олширч, үүнийгээ дагаад шагналын сан нь томров. "CS2" төрлийн "The MongolZ" баг хэдийнэ дэлхий нийтийн анхаарлыг татаж, дан ганц монголчууд гэлтгүй олон улсад ч үзэгч фэнүүдтэй болж, цар хүрээгээ тэлсэн билээ. Тэдний сүүлийн үед үзүүлж буй тоглолтууд, амжилтууд маргаангүй гайхалтай байгаа. Үүнийхээ хэрээр ч ашиг орлого нь нэмэгдэж, дэлхийн баян багуудын тоонд орж эхэлжээ.

2024 оны байдлаар "The MongolZ"-ийн зөвхөн шагналын орлого нь 986,347 ам.доллар болж, оны төгсгөл гэхэд 1 сая ам.доллар давах төлөвтэй байна. Энэ зөвхөн тэмцээний шагнал сангаас орж ирсэн орлого гэдгийг санах хэрэгтэй. Үүнээс гадна стикер, зар сурталчилгаа, ивээн тэтгэгчдийн орлого орж ирнэ.

Тэдний хувьд энэ он гарснаар дараах амжилтуудыг үзүүлж, шагнал хүртжээ. Тухайлбал,

eXTREMESLAND 2023: Аварга, 25 мянган ам.доллар
PGL Мajor Copenhagen 2024: 15-16 дугаар байр, 20 мянган ам.доллар
ESL Pro League Season 19: 9-12 дугаар байр, 23.5 мянган ам.доллар
MESA Nomadic Masters Spring 2019: Аварга, 50 мянган ам.доллар
YaLLa Compass 2024: Аварга, 200 мянган ам.доллар
Esports World Cup 2024: 9-12 дугаар байр, 25 мянган ам.доллар
Skyesports Championship 2024: Дэд аварга, 70 мянган ам.доллар
IEM Rio 2024: 7-8 дугаар байр, 6 мянган ам.доллар
ESL Pro League Season 20: 9-12 дугаар байр, 23.5 мянган ам.доллар
IEM Cologne 2024: 9-12 дугаар байр, 16 мянган ам.доллар
ESL Challenger at DreamHack Summer 2024: 5-6 дугаар байр, 3 мянган ам.доллар
IEM Katowice 2024: 17-20 дугаар байр, 4.5 мянган ам.доллар
Elisa Masters Espoo 2024: 3-4 дүгээр байр, 15 мянган ам.доллар
Thunderspick World Championship 2024: Аварга, 500 мянган ам.доллар

"The MongolZ" 2024 онд олсон орлогоороо "CS2"-ийн багууд дундаа дэлхийд дөрөвдүгээрт жагсч байна. Тэдний дээр Украины "NaVi" 1.6 сая ам.доллар, Оросын "Spirit" баг 1.4 сая ам.доллар, Германы "G2" 1.2 сая ам.доллар хүртсэн амжилтаараа тус тус бичигджээ.