Эмнести Интернэшнл гадуур хувцсаа тайлж, дотуур хувцастайгаа гудамжаар явснаасаа болж баривчлагдсан эмэгтэйг "нэн дариу, болзолгүйгээр" суллахыг шаардаж байна. Уг эмэгтэйн үйлдэл нь Ираны хувцаслалтын дагуух хатуу дүрмийг эсэргүүцэж буй үйлдэл байсан гэж мэдэгджээ.

Тодруулбал, Тегеран дахь нэр хүндтэй Исламын Азад их сургуулийн дотор нэр нь тодорхойгүй нэгэн эмэгтэйн ороолтыг Басиж цэргийн хүчний албан тушаалтан урсны дараа тухайн эмэгтэй эсэргүүцлээ үзүүлж бүх хувцсаа тайлсан аж.

Олон нийтийн сүлжээнд тавигдсан видео бичлэгүүдээс харахад эмэгтэй хувцсаа тайлж, дотуур хувцастайгаа гудамжинд гарч байгаа харагдана. Дараа нь энгийн хувцастай үл таних эрчүүд түүнийг машинд суулгаж буй бичлэг нийтлэгдсэн байна. Оюутны хэвлэл мэдээллийн хэрэгсэл болох Амир Кабирын мэдээллийн товхимолд тус эмэгтэй толгойн алчуураа өмсөөгүйн улмаас Басижийн гишүүд дарамталсан гэж мэдэгджээ.

Ираны дүрэм ёсоор эмэгтэйчүүд олон нийтийн газар толгойн алчуур, сул хувцас өмсөх ёстой.

Орон нутгийн хэвлэл мэдээллээр гудамжинд дотуур хувцастайгаа явж байсан эмэгтэй баривчлагдах үедээ зодуулсан гэж мэдээлсэн байна. Одоогийн байдлаар тухайн эмэгтэйн биеийн байдал, хаана байгаа талаар мэдээлэл алга. Эмнести Интернэшнл уг хэргийг "бие даасан, шудрага" мөрдөн шалгахыг уриалав. Тус байгууллага цахим хуудас дээрээ "Ираны эрх баригчид, аюулгүй байдлын албаныхан зүй бусаар эмэгтэйчүүдийг нүүрээ таглах дүрмийг эсэргүүцсэн эмэгтэйг хувцсаа тайлсных нь дараа хүчирхийлэл үйлдэж баривчилсан. Уг их сургуулийн оюутныг нэн даруй, болзолгүйгээр суллах ёстой" гэж бичжээ. Мөн "Түүнийг суллагдах хүртэл нь эрүүдэн шүүгдэхээс эрх баригчид хамгаалах ёстой. Мөн ар гэрийнхэн болон өмгөөлөгчтэй нь холбогдох боломжийг хангах ёстой" гэсэн байна.

Ираны консерватив Фарс мэдээллийн агентлаг уг явдлыг баталж, оюутан "зохисгүй хувцас өмссөн" бөгөөд хамгаалалтын ажилтнууд хувцаслалтын дүрмийг дагаж мөрдөхийг сануулсан хэдий ч оюутан эмэгтэй эсэргүүцэл үзүүлсэн гэж мэдэгджээ.

Гэрчүүдийн мэдээлснээр, хамгаалалтын албаныхан оюутан эмэгтэйтэй "тайван" ярилцаж байсан ба тэдний үйлдэл ямар нэгэн байдлаар түрэмгий байгаагүй гэсэн аж. Хувцаслалтын дүрэм зөрчсөн хэргээр баривчлагдсан Махса Амини нас барсны дараа буюу хоёр жилийн дараа уг хэрэг болсон юм. Зарим эмэгтэйчүүд хувцаслалтын дүрмийг эсэргүүцэж, толгойн алчуураа тайлсан жагсаалын дараа эрх баригчид хатуу аргаар жагсаалыг зогсоож байжээ.