Молдавын ерөнхийлөгчийн сонгуулийн хоёр дахь шат өнөөдөр /2024.11.03/ болж байна. Энэ сонгуулиар Молдавын хувь заяа Европ руу чиглэх үү, Кремлийн тойрог замд буцаж орох уу гэдгийг шийдэх юм. Барууныг баримтлагч ерөнхийлөгч Майя Санду Оросын талыг баримтлагч, Социалист намаас нэр дэвшигч, ерөнхий прокурор асан Александр Стояноглотой өрсөлдөж байна.

Орос, Украины дайн ид өрнөж буй сүүлийн жилүүдэд ерөнхийлөгч Майя Санду Молдавыг Европын холбоонд урьд өмнөхөөс илүү ойртуулсан гэж үздэг. Эхний шатанд тэр 42 хувийн санал авчээ. Эхний шатны санал хураалтын өдөр Молдавыг Европын холбоонд элсүүлэх тухай бүх нийтийн санал асуулга мөн явагдсан. Энэ хоёр санал хураалтад хоёуланд нь Кремлийн нөлөө орсон гэж Майя Санду үзэж байна. Тиймээс үүнийг Молдавын ардчилалд урьд өмнө байгаагүйгээр халдсан явдал гэж нэрлэсэн юм.

Тэрбээр өрсөлдөгч Александр Стояноглог Кремлийн нэрийн өмнөөс Кишинев хот руу нэвтрэхийг зорьж буй “Трояны морь” гэж нэрлэжээ.

“WatchDog.MD” судалгааны төвийн захирал Валериу Пашагийн хэлснээр молдавчууд өнөөдөр иргэдээс сонгогдсон ерөнхийлөгчтэй болох уу, Оросын бохир мөнгөөр ялсан хүнтэй болох уу гэдгээ сонгох нь.

Оросын дэмжлэгтэй олигарх Илан Шор өнгөрсөн сард болсон санал хураалтын өмнө Кремльд ээлтэй нэр дэвшигчийн төлөө ажиллах хүмүүст мөнгө санал болгожээ. Сонгуулийн өмнө Стояногло урьдчилсан байдлаар 10 хувийн санал авсан байсан ч эхний шатны өдөр 26 хувийн санал авчээ. Кремль ч тэр, Илан Шор ч тэр хөндлөнгийн оролцоог үгүйсгэсэн. Гэхдээ хоёр дахь шатны санал хураалт дээр энэ байдал давтагдаж магад гэж Молдавын албаныхан анхааруулж байна.

Майя Сандугийн хувьд ерөнхийлөгчөөр ажиллах хугацаандаа дараалсан олон хямралтай нүүр тулсан. Эхлээд Covid-19 цар тахал, дараа нь Украины дайн, улмаас байгалийн хийн хямрал. Молдавыг Оросын байгалийн хийн хамааралгүй болгосноор Европын хамгийн ядуу орнуудын нэг ихээхэн хохирол амсчээ. Инфляци богино хугацаанд 30 гаруй хувьд хүрч, ядуурал нэмэгдэв. Эхний шатны сонгуулийг Европын холбоонд элсэх санал асуулгатай нэг өдөр давхцуулснаар Санду өөрийгөө Молдавыг Европт авчрах цорын ганц улстөрч мэт харуулахыг хүсч байна гэж шүүмжлэгсэд ч гарч иржээ.

Александр Стояногло өөр хоорондоо зөрчилтэй мөрийн хөтөлбөр дэвшүүлээд буй. Тэрбээр Москватай харилцаагаа сэргээхийг уриалдаг атлаа Европын холбоонд элсэх эрмэлзэлтэй байгаагаа илэрхийлсэн юм.