Иран ойрын өдрүүдэд Иракаар дамжуулан Израильд халдахаар бэлтгэж байж магадгүйг Израилийн эх сурвалжууд мэдээлэв. Хоёр тал сүүлийн үед хэд хэдэн удаа харилцан цохилт өгсөн билээ. АНУ-ын хэвлэлд мэдээлснээр халдлагыг Ирак дахь Ираныг дэмжигч зэвсэгт хүчнээр дамжуулан үйлдэж магадгүй аж. Ингэхдээ олон тооны нисгэгчгүй онгоц болон баллистик пуужингаар довтлох төлөвтэй байна.

Халдлагыг арваннэгдүгээр сарын 5-нд болох АНУ-ын ерөнхийлөгчийн сонгуулийн дараа үйлдэх магадлал өндөр гэдгийг Ираны албаны эх сурвалжууд мэдээлжээ.

Энэ нь өнгөрсөн долоо хоногт Израилиас Ираны цэргийн байгууламжид цохилт өгсний хариу алхам болох юм. Үүнээс өмнө Иран аравдугаар сарын 1-нд Израилийн эсрэг томоохон хэмжээний пуужингийн дайралт хийсэн. Ираны Исламын хувьсгалын гвардийн корпусын ерөнхий командлагч, хошууч генерал Хоссейн Салами Пүрэв гаригт мэдэгдэл хийхдээ "Израиль төсөөлж боломжгүй хариу авна" гэжээ. Израилийн ерөнхий сайд Беньямин Нетаньху ч бас мөн өдөр "Манай улс Ираны аль ч хэсэгт хүрэх боломжтой" гэж анхааруулсан байна.