К-попийн шүтэн бишрэгчид дэлхий дахинд олон сая бий. Тэр дундаа хамгийн хүчирхэг шүтэн бишрэгчдийн тоонд тайландууд багтана.

Өмнөд Солонгосын “Hybe” корпорацийн дотоод баримт бичиг саяхан задарснаар “BlackPink” хамтлаг болон хамтлагийн гишүүн Лисатай холбоотой цуу яриа дэгдээд буй. Тэгвэл энэ цуу ярианаас болоод тайландууд  “Hybe” корпорацийн эсрэг нэгджээ.

“Хөгжмийн салбарын тайлан” гэх уг баримт бичиг саяхан Үндэсний ассамблейн аудитын үеэр ил болсон. Уг тайланд “BlackPink” болон Лисагийн амжилтыг үгүйсгэсэн байжээ. Тодруулбал, Лисагийн “MTV Video Music Awards”-ын амжилтыг сэжигтэй санал хураалттай холбон тайлбарлажээ. Санал хураалтад дотоодын шүтэн бишрэгчид хөндлөнгөөс оролцсон гэж тайланд бичсэн байна. Дотоодын шүтэн бишрэгчид гэдэг үгээр тайландуудыг хэлжээ.

Лиса Тайланддаа үндэсний хэмжээний шүтээн гэхэд болно. Тийм ч учраас Тайландын цахим сүлжээнд “HybeApologizeToLisa” буюу “Лизагаас уучлалт гуй” хаштаг трэнд болж байна.

“Hybe” корпораци энэ оны дөрөвдүгээр сард ч бас тайландуудын эгдүүцлийг төрүүлж байв. Тодруулбал, тус корпораци “Illit” нэртэй шинэ охидын хамтлагийн шүтэн бишрэгчдийн клубын нэрийг Лисагийн клубтэй төстэйгөөр “Lillys” гэж нэрлэжээ. Лисагийн шүтэн бишрэгчдийн клубын нэрийг “Lillies” гэдэг. Шүтэн бишрэгчдийн эгдүүцлийг төрүүлсэн энэ үйлдлийнхээ төлөө “Hybe” корпораци уучлалт гуйгаад, өөр нэр сонгохоо амлажээ.