Өнөө цагийн CS-ийн шилдгүүдийн нэг Никола Ковач буюу "Niko" удахгүй "G2"-г орхиж, Саудын Арабын "Falcons" баг руу явна гэх шуум гарсан. Тэгвэл "G2"-ийн захирал Альбан Дешелотт энэ талаар дэлгэрэнгүй ярьжээ. Түүний хэлснээр багт нь "Niko"-г үлдээх сонголт байгаа ч сүүлд нэгтгэсэн "malbsMd"-ийн тоглолт сайн байгаа учир энэ шийдвэрийг нухацтай бодсоны эцэст гаргах аж.

Хэрэв "Niko"-г явуулбал "malbsMd" түүний байрлалд тоглож, дахин нэг тоглогчийг элсүүлэх гэнэ. Альбан ярихдаа "Магадгүй бид ‘malbs’-ийн анкор байрлалд хэнийг тоглуулах вэ гэдгээ хэдийнэ судлаад эхэлсэн байх. ‘Niko’ явбал ‘malbs’ түүний байрлал руу шилжинэ" гэв.

Альбаны бодож буйгаар ‘Niko’ энэ оны эцэс гэхэд шинэ багтайгаа нэгдэх гэнэ.

"Niko" багаас явснаар "m0NESY"-ийн асуудал хөндөгдөнө. Учир нь тэд энэ багт танилцаж, сайн ах дүүс, хамтрагчид болсон. Илья Осипов буюу "m0NESY"-г "NaVi"-д эргэн очно гэх яриа үеийн үед л гарч байдаг. Тэгвэл Альбан энэ талаар "Бид багийнхаа бүрэлдэхүүнийг ирээдүйд ямар байх талаар судалж байгаа. Бидний хувьд m0NESY бол энэ төслийн амин зүрх. Түүний гэрээнд нэгээс олон жил үлдсэн. Бид л шийдэх хэрэг. Хэрэв тэр явахыг хүсвэл бид зөвшөөрнө. Тэр ‘Niko’-той ойр дотно. ‘Niko’ түүний зөвлөгч, үлгэр дуурайлал нь. Түүний тамирчны замналд чухал үүрэг, нөлөө үзүүлсэн хүн. Өнөөдрийн байдлаар ‘m0NESY’ бол дэлхийн шилдэг. Түүнд өөрийнхөө багийн лидер болох боломж нь бий" гэжээ.

Ерөнхийдөө Альбаны хэлснээр G2 баг Илья дээр түшиглэн багаа босгох бөгөөд түүнийг өөр багт очиж, туслах дүр байснаас илүүтэйгээр өөрийнхөө багийн лидер болоосой гэж хүсч байгаа аж.