Монголын сагсан бөмбөгийн дээд лигийн талбай дээрх гал гарсан тоглолтуудаас гадна талбайн гаднах үйл явдлууд олны анхаарлыг татаж байна. Тиймээс та бүхэндээ үйл явдлуудыг товчлон хүргэе.

А.БАЗАРГҮР ШИЙТГҮҮЛЭВ

Дарханд болсон айхтар зодооны дараа бүх зүйлс ил болжээ. SG Apes-ийг хожиж, магнай тэнийсэн Сэлэнгэ Бодонсын залуус Дарханы зочид буудалд INUT YES TLG багийн залуустай муудалцаж, нударга зөрүүлсэн нь дэлгэгдэв. Бодонсоос энэ маргаанд А.Базаргүр, Б.Мөнхбилэг нар орооцолдсон бол TLG-ээс Э.Хосбаяр, А.Батхуяг нар нэр холбогдсон аж.

Эцэст нь Бодонсын удирдлагууд А.Базаргүр, Б.Мөнхбилэг нарыг тус бүр нэг сая төгрөгөөр торгож, зургаан тоглолт өнжүүлэхээр болжээ. Харин INUT YES TLG багийн дасгалжуулагч С.Тулга цагдаагийн газар гомдол гаргахаа больж, Бодонсын залуусыг уучилсан гэнэ.

Г.БОЛОР-ЭРДЭНИЙН ДРАМА ДУУСЧЭЭ

Өнөө цагийн шилдэг холбон тоглогч нарын Г.Болор-Эрдэнэ энэ улирал аль багт тоглох вэ гэх асуулт анхаарал татаад байсан. Тэгвэл асуудал жигдэрч, Бишрэлт Металл багийн зүгээс Г.Болор-Эрдэнийг хуучин багт нь эргүүлэн өгчээ. Ингэснээр Г.Болор-Эрдэнэ Уурхайчид багт эргэн ирэв. Тэрбээр эргэн ирсэн анхны тоглолтдоо 11 оноо, 10 ашигтай дамжуулалт, 5 самбар гэсэн үзүүлэлтийг толилуулжээ.

ДАСГАЛЖУУЛАГЧ НАР АЖЛАА ӨГЛӨӨ

Өнгөрсөн улирал дээд лигийн багууд дунд монгол дасгалжуулагчай баг тун цөөхөн байсан. Харин энэ улирлаас монгол дасгалжуулагчид олширч, аваргын төлөө өрсөлдөх магадлалтай гол багуудыг удирдаж эхэлсэн.  Гэвч удаан үргэлжилсэнгүй.

BCH Knights багийн ахлах дасгалжуулагч Ц.Эрдэнэбаясгалан ажлаа хүлээлгэн өгчээ. Түүний удирдлага дор баг нь 2-2 гэсэн амжилттай улирлыг эхлүүлсэн юм. Нээлтийн тоглолтод Дархан Юнайтед багт хожигдож, дараа нь мөнхийн өрсөлдөгч Хасын Хүлэгүүд багт олон онооны зөрүүтэй дийлдсэн.

Тэгвэл SG Apes-ийн ахлах дасгалжуулагч Р.Отгонжаргал мөн ажлаа өгчээ. Түүний ажлыг туслах дасгалжуулагч нь хүлээн авсан гэнэ. Apes-ийн хувьд хүлээлт өндөртэй баг ч нэг л учраа олохгүй байгаа харагдсан. Тиймээс нөхцөл байдал дордоогүй байгаа дээр шийдэл олох гэж хичээжээ. Ямартай ч шинэ дасгалжуулагчийн удирдлага дор өчигдөр Дархан Юнайтедыг хожив.

Т.САНЧИР ЭРГЭН ИРНЭ

Өнөөдөр болох Налайх Бизон болон Хасын Хүлэгүүд багуудын тоглолт тун сонирхолтой болох шинжтэй. Учир нь Т.Санчир бэртлээсээ эргэн ирж, Бизоны өмсгөлтэй хуучин багийнхаа эсрэг энэ улирлын эхний тоглолтоо хийх гэж байна. Том зорилго тавьсан Бизонд Т.Санчирын орон зай өгүүлэгдэж байгаа нь үнэхээр харагдсан. Тэгвэл өнөөдөр Монголын шилдгүүдийн нэг талбайдаа эргэн ирнэ.