УИХ-ын Пүрэв гаригийн чуулганы үдээс хойшхи хуралдаанаар Монгол Улсын 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслүүдийн хоёр дахь хэлэлцүүлгээр үргэлжиллээ. Энэ үеэр УИХ-ын гишүүн Д.Энхтүвшин улс төрийн намуудыг мөрийн хөтөлбөртөө тусгасан төсвийн зарлагыг бууруулах заалтуудаа хэрэгжүүлэхийг шаардлаа. УИХ-ын сонгуулийн өмнө улс төрийн намууд улсын төсвийн үргүй зардлыг бууруулж, төсвийн тэлэлтийг зогсоож, иргэд, аж ахуйн нэгжүүдийн нуруун дээрх татварын болоод олон төрлийн дарамтыг бууруулахаа амлаж байсан байсан юм. Тухайлбал,

МАН: Улсын төсвийн зарлагын ДНБ-д эзлэх хувийг 25 хувь хүртэл бууруулна.

АН: Монгол улсын нэгдсэн төсвийн зардлыг 20 хувиар танана.

ХҮН: … төсвийн зардлыг бодитоор бууруулах бодлого баримтална гэж мөрийн хөтөлбөртөө тусгасан.

Гэтэл 2025 оны төсвийг 2023 онтой харьцуулахад 60 хувиар нэмэгдүүлж, ДНБ-ны 37.7 хувь  болгож нэмэгдүүлэх төсөл оруулж ирсэн нь хэдхэн сарын өмнө иргэддээ амлаж байсан амлалтаасаа ухарсан явдал гэдгийг УИХ-ын гишүүн Д.Энхтүвшин шүүмжилж,  улс төрийн намуудыг амлалтаа биелүүлэхийг шаардлаа.