"52-ын даваа орчмын зорчих хөдөлгөөн хэвийн үргэлжилж байна"

Цас орж ихэнх нутгаар хүйтрэхийг Онцгой байдлын ерөнхий газраас анхааруулсан. Тодруулбал, арваннэгдүгээр сарын 2-нд баруун аймгуудын нутгийн зүүн хэсэг, төв болон говийн аймгуудын нутгийн зарим газраар, 03-нд нутгийн зүүн хагаст цас орж, цасан шуурга шуурч, ихэнх нутгаар хүйтрэх аж.

Үүнээс шалтгаалан нийслэлийн Сонгинохайрхан дүүргийн 32 дугаар хорооны нутаг "52-ын даваа"-ны орчмын замыг хаасан гэх мэдээлэл цахим орчинд цацагдсан. Энэ талаар Авто тээврийн үндэсний төвөөс тодруулахад " 52-ын давааны замын зорчих хөдөлгөөн хэвийн үргэлжилж байна. Хэсэг хугацаанд халтиргаа гулгаанаас шалтгаалан саатал үүссэн. Одоогийн байдлаар цаг агаараас шалтгаалан хаасан авто зам байхгүй байна" гэв.

Нойтон цас орж цасан шуургатай байгаа үед орон нутгийн замд зорчихдоо:

Тээвэрлэлтэд гарахын өмнө мэргэжлийн байгууллагаас цаг агаар, замын нөхцөл байдлын талаарх мэдээллийг авах,
Тээврийн хэрэгслийн техникийн бэлэн байдлыг сайтар шалгах,
Бензин, түлшийг хангалттай нөөцлөх,
Замын нөхцөл хүндэрч тээвэрлэлт гүйцэтгэхэд хүндрэлтэй нөхцөл байдал үүссэн тохиолдолд аюулгүй байдлыг хангаж зогсох,
Хөдөлгөөнд соёлтой оролцох,
Шөнийн цагт гэрэл шилжүүлэх,
Жолооч болон зорчигчид суудлын бүсийг тогтмол зүүх,
Замын нөхцөл байдал тохируулж хурдаа сонгож явахыг анхааруулж байна.