Түүхий эдийн арилжааны аварга "Трафигура" групп Монгол дахь газрын тосны бизнесийн ажилчид нь луйврын хэрэгт холбогдсоныг илрүүлжээ. Үүнээс болж компани 1.1 тэрбум ам.долларын хохирол хүлээсэн гэж үзэж байна. Тус компани никельтэй холбоотой залилангийн хэргээр 500 сая ам.доллар алдаад хоёр жил ч болоогүй байгаа билээ.

"Трафигура" компанийн Монгол дахь зарим ажилчин төлсөн мөнгөнийхөө хэмжээг өсгөж харагдуулахын тулд мэдээлэл, бичиг баримтыг өөрчилж, таван жилийн турш хугацаа хэтэрсэн өрийг зориудаар нуун дарагдуулсан болохыг илрүүлсэн байна. Энэ асуудлыг 2023 оны сүүлээр анх илрүүлжээ.

Компанийн хувьцаа 1400 орчим ажилчны эзэмшилд байдаг. Компани ажилчдынхаа тэтгэврийг төлөхийн тулд тасралтгүй өндөр ашиг олохыг эрмэлзэж буй. Гэвч Монгол дахь алдагдал нь зах зээлийн тогтворгүй байдлаас болж буураад байсан орлогод ихээхэн нөлөөлөх болов. Оны эхний хагаст 1.47 тэрбум ам.долларын ашигтай ажилласан гэж компани зарлаад байсан. Арванхоёрдугаар сард бүтэн жилийн ашиг нь ойролцоогоор хоёр тэрбум ам.доллар буюу түүнээс дээш гарна гэж тооцоолж байв.

"Трафигура" нь "Gunvor Group", "Rosneft PJSC" зэрэг компанитай өрсөлдсөөр ирсэн Монголын хамгийн том шатахуун нийлүүлэгчдийн нэг байсаар ирсэн.

Дээрх хэрэгтэй холбоотойгоор Улаанбаатар дахь оффисын хэд хэдэн ажилтныг ажлаас нь түдгэлзүүлжээ. "Трафигура"-ийн Монгол дахь тэргүүн Михаил Зельдович ч мөн ажлаа хүлээлгэн өгөх болсон байна.