АНУ-ын ерөнхийлөгч асан Дональд Трамп Пүрэв гаригт Висконсин мужийн Грин Бэй хотод хүрэлцэн иржээ. Тэрбээр “Боинг 757” онгоцноос буумагцаа өөрийнх нь нэрийг бичсэн цагаан өнгийн хогны машинд суусан байна.

Ерөнхийлөгч Жо Байден өмнөх өдөр нь түүний дэмжигчдийг хогтой зүйрлэн хэлсэн тул Трамп энэ үйлдлээрээ анхаарал татахыг хүсчээ. Тодруулбал, Трампийн кампанит ажлын үеэр нэгэн комедиан Пуэрто Риког “хог хөвсөн арал” гэж тодорхойлсон. Үүнээс болж Трамп болон Бүгд найрамдах намынхан хурцаар шүүмжлүүлжээ. Ерөнхийлөгч Байден энэ талаар хэлэхдээ “Тэнд хөвж байгаа хог гэвэл Трампийг дэмжигчдийг л хэлэх байх” гэсэн юм. Трамп кампанит ажлаараа латинчуудыг доромжилж байгаа нь ухамсаргүй үйлдэл гэж хэлэхийг Байден зорьсон гэлээ.

Трамп цагаан цамц, шар өнгийн ажлын хантааз өмссөн байсан бөгөөд “Миний хогны машин ямар байна даа? Жо Байден, Камала Харрис нарт үүнийг хүндэтгэлтэйгээр зориулж байна. Би Пуэрто Рикод хайртай. Пуэрто Рико ч надад хайртай” гэжээ.

Тэрбээр комедиан Тони Хинклиффийг буруутгах нь бүү хэл пуэрто рикочуудаас уучлалт гуйх ч шаардлагагүй гэсэн байна. Комедианы хошигнол Трампийн үзэл бодлыг тусгаагүй гэж түүний хэвлэлийн төлөөлөгч мэдэгджээ.