АНУ Даваа гаригт Сири дэх "ISIS"-ын баазуудад цохилт өгснөөр тус байгууллагын 35 ажилтан амиа алджээ. Энэ талаар АНУ Лхагва гаригт мэдээлэв. Уг цохилтоор "ISIS"-ын байгууламжуудыг, тэр дундаа удирдах албан тушаалтнуудыг онилсон гэдгээ АНУ "Х" платформд мэдэгджээ. 35 хүний дунд тэдгээр удирдах албан тушаалтан багтсан эсэх нь тодорхойгүй.

Сүүлийн үед Ойрхи Дорнод дахь "ISIS"-ын эсрэг ажиллагаа эрчимжиж байна. Тухайлбал, АНУ, Иракийн хүчнийхэн долоо хүрэхгүй хоногийн өмнө Иракийн Анбар мужид "ISIS"-ын дайчдын эсрэг ажиллагаа явуулжээ. Мөн хоёр хоногийн өмнө Иракийн төв хэсэгт байрлах "ISIS"-ын хэд хэдэн байршилд цохилт өгснөөр долоон ажилтан амь үрэгдсэн байна. Иракийн Аюулгүйн хүчнийхэн энэ сарын эхээр "ISIS"-ын дөрвөн гишүүнийг хороосны нэг нь ахлах албан тушаалтан байжээ.

Иракт өдгөө АНУ-ын 2500 орчим цэрэг байрлаж байна. Тэд Иракийн хүчин зөвлөгөө өгч, туслах зорилготой. Сүүлийн үеийн хурцадмал байдлаас болоод АНУ тэргүүтэй цэргийн эвслийн бүс нутгийг орхих хугацаа тодорхойгүй хугацаагаар хойшлоод байна.

Бүс нутаг дахь АНУ-ын ажиллагаа нэмэгдэж байгаа нь "ISIS" дахин бүлэглэж эхэлсэнтэй холбоотой юу гэж Пентагоны хэвлэлийн төлөөлөгч Сабрина Сингхээс асуужээ. Тэрбээр "Бүлэглэл дэлхийн бусад хэсэгт байр сууриа өргөжүүлсэн ч энэ нь бүс нутагт хүчирхэг болсон гэсэн үг биш. Тэд өмнөх шигээ биш ч гэлээ аюул заналхийлсээр байна" гэж хариулсан юм.