Улаанбаатар хотын түгжрэл бидний өмнө тулгамдаж буй асуудлын нэг. Түгжрэлийг бууруулах өчнөөн ажил санаачилж, хэчнээн тэрбум төгрөг зарцуулсан ч төдийлөн үр дүнгээ өгсөн шийдэл одоохондоо алга. Тэгвэл хэдхэн хоногийн өмнө импортоор орж буй автомашинд Улаанбаатарын дугаар олгохгүй байх шийдвэрийг танилцуулсан.

Үүнээс шалтгаалан хотын дугаар авах иргэдийн тоо эрс нэмэгдэж автомашины худалдааны төвүүдэд дугаар авах иргэдийн дараалал үүсчээ.

Энэ удаад автомашины улсын дугаарын эрэлт хэр байгаа талаар сурвалжиллаа. Автомашин худалдаа эрхлэгчдийн хэлж буйгаар дугаар авах иргэдийн тоо эрс нэмэгдэж, үнэ нь өсчээ.

"ДУГААР НЭМЖ ОЛГОХГҮЙ БАЙЛАА ГЭЭД ЗАМЫН ТҮГЖРЭЛ, АГААРЫН БОХИРДОЛ БУУРНА ГЭЖ БАЙХГҮЙ”

Баянзүрх дүүрэгт байрлах Авто тээврийн үндэсний төвийн автомашины улсын дугаар олголтын газарт өглөөний 10:00 цагийн үед дараалал тийм их биш ч хүн тасрахгүй үйлчлүүлж байв. Завхан аймгийн иргэн Б.Даваадорж орон нутгийн дугаараа сольж Улаанбаатарын дугаар авахаар өглөө эрт иржээ. Учир нь ирэх сарын 8-наас улаанбаатарын дугаар олгохгүй гэх мэдээллийн дагуу Авто тээврийн үндэсний төвүүд хүн ихтэй байгаа гэж дуулсан учир ийнхүү эрт ирсэн нь энэ аж. Тэрбээр, шинээр оруулж ирж байгаа машинд улаанбаатарын дугаар олгохгүй гэх шийдвэрт шүүмжлэлтэй байгаагаа хэлэв. Түүний хувьд орон нутгийн харьяалалтай учир улаанбаатарын дугаар авахын тулд шилжилт хөдөлгөөн хийх шаардлага үүссэн байна. Тэрбээр “Хөдөө ажилладаг тул төдийлөн зав гардаггүй. Улаанбаатарын дугаар авахын тулд хоёр өдөр зарцууллаа. Орон нутгийн дугаартай байхаар татвар авна гэнэ.

Тэгээд хотын дугаар авах гэхээр олгохоо болино гээд дандаа иргэдийг төөрөгдүүлсэн, чирэгдэл учруулсан шийдвэр гаргаж байх юм. Шийдвэрүүд нь хоорондоо уялдаа холбоогүй.

Дугаар нэмж олгохгүй байлаа гээд замын түгжрэл, агаарын бохирдол буурна гэж байхгүй” гэсэн юм. Тэнд автомашины дугаар авах гэж ирсэн иргэд тус шийдвэрт нэлээд шүүмжлэлтэй хандаж байгаагаа илэрхийлж байсан юм.

Автомашины улсын дугаар хэвлэлтийн газрын ажилтны хэлж буйгаар, уг шийдвэрийг танилцуулснаас хойш дугаар авах иргэдийн тоо эрс нэмэгджээ. Тэдний дийлэнх нь автомашины худалдаа эрхлэгчид байгаа ажээ. Учир нь импортоор оруулж ирсэн машин нь зарагдахгүй байх эрсдэл үүссэнийг хэлэв. Мөн нэмж дугаар олгохоо больсноор эрэлт ихсэхээр дугаарын үнэ хөөрөгдөх эрсдэлтэй гэсэн юм.

Шинээр автомашин худалдаж буй иргэд багадаа 500 мянган төгрөгөөр дугаар худалдаж авч буй бөгөөд зарим дугаарыг түүнээс ч өндөр үнээр худалдаж авч байна гэв.

"ТӨР ДАНДАА УЯЛДАА ХОЛБООГҮЙ ШИЙДВЭР ГАРГАЖ, ИРГЭДЭД ЧИРЭГДЭЛ УЧРУУЛДАГ"

Автомашины худалдаа эрхлэгч Ж.Сэргэлэн “Арваннэгдүгээр сарын 8-наас шинээр дугаар нэмж олгохоо болихоор автомашины борлуулалт эрс муудна. Миний хувьд суудлын жижиг машин тэр дундаа акуа, приус 20, 30 оруулж ирж зардаг. Яг энэ үед машины борлуулалт улам мууддаг үе. Гэтэл ийм шийдвэр гаргаж байгаа нь бидэнд хүндрэл үүсгэж байна. Зарж дуусаагүй байгаа машинууддаа дугаар авахгүй бол 8-наас өмнө зарагдаж дуусна гэж байхгүй. Дугаар авсан машины үнэ гаальтай машины үнээс хямд болчихдог. Цаашдаа машины борлуулалт улам муудахаар болчихлоо. Улаанбаатарынхан орон нутгийн дугаар авч болох байх. Гэхдээ орон нутгийн машин бас татвар төлдөг болсон биздээ. Ийм байхад бид яаж амьдрах болж байна. Дандаа уялдаа холбоогүй шийдвэр гаргаж байх юм гэж учирлаж байлаа.

Тэгвэл Замын хөдөлгөөний удирдлагын төвийн мэдээлснээр, шийдвэр хэрэгжиж эхэлснээс хойш огт дугаар олгохгүй гэсэн үг биш.

Өөрөөр хэлбэл, таван шалгуур үзүүлэлтээр нийслэл хотод тээврийн хэрэгслийн улсын бүртгэлийн дугаарыг олгоно.

Тухайлбал тээврийн хэрэгслийн өмчлөгч, эзэмшигч нь нийслэлийн оршин суугч иргэн, нийслэлд бүртгэлтэй хуулийн этгээд байх шаардлагатай аж. Мөн өмчлөгч, эзэмшигч нь ямар нэг торгууль, татварын өргүй байх ёстой. Дээрээс нь тээврийн хэрэгслийн хөдөлгүүрийн экологийн ангилал нь “евро-4” эсвэл түүнтэй дүйцэхүйц буюу түүнээс дээш болон сүүлийн 10 жилийн дотор үйлдвэрлэгдсэн тээврийн хэрэгсэл байна гэж заажээ. Үүн дээр нэмээд экспортын өмнөх техникийн хяналтын үзлэгт орсон байх зэрэг шалгуурыг тавих юм байна. Шийдвэр хэрэгжиж эхлэх хугацаа хүртэл Авто тээврийн үндэсний төв улсын дугаар олголтыг хариуцах юм байна. Харин ирэх сарын 8-наас хойш автомашины дугаар олголтыг Замын хөдөлгөөний удирдлагын төв хариуцах ажээ.

Автотээврийн үндэсний төвийнхөн нэлээд ачаалалтай ажиллаж байгаа ажээ. Тэрбээр дугаар олголттой холбоотой мэдээлэл авъя гэхэд өглөөнөөс эхлээд хүнтэй ч ярих завгүй байна. Уг шийдвэрийг танилцуулснаас хойш ачаалал 50 орчим хувиар нэмэгдээд байна. Өдөрт 1700 гаруй машинд дугаар олгож байна. Улаанбаатарын серитэй дугаарын нөөц хурдан дуусаж шинэ серийн дугаар задалсан. Бид маш ачаалалтай л ажиллаж байна” гэлээ

Тэгвэл тус шийдвэрийг " чөлөөт зах зээлийг боомилж, хувийн өмчид халдсан шийдвэр. Хэрвээ хувийн өмчид халдвал ядуурал улам л бий болно. Түгжрэл бүх улсад бий. Түүнийг татварын аргаар шийддэг. Жишээлбэл хотын төв рүү орсон машинаас татвар авах, хотын төвийн зогсоолыг үнэтэй болгох зэргээр шийдэх хэрэгтэй. Гаднын улсуудад тэр дундаа Европ, АНУ-д ингэж шийдсэн байдаг. Түүнээс хориглож, хаах нь буруу" гэж эдийн засагч Р.Даваадорж хэлэв.

НИЙСЛЭЛД БАЙГАА МАШИНЫ ТОО 55 МЯНГААР ХЭТЭРСЭН 

Нийт нийтийн тээврийн 39.8 хувь нь нийслэлд байна. Нийтийн тээврийн эргэлтийн хурд удааширсан. Түгжрэлийн оргил цагаар түгжрэлийн урт 90 гаруй км үргэлжилж байна. Энэ байдлаараа байвал цаашдаа замын хөдөлгөөний оргил ачаалалтай үед машины хурд явган хүний хурдад дөхөхөөр байгаа юм. Мөн түгжрэлийн урт 200 км хүрэхээр тооцоолол гарсан байна. Тиймээс нийслэлийн ИТХ-аас энэ оны хоёрдугаар сарын 8-нд нийслэлд олгох тээврийн хэрэгслийн улсын бүртгэлийн дугаарын дээд хязгаарыг 730 мянга байхаар тогтоол гаргасан. Гэвч өнөөдрийн байдлаар Улаанбаатар хотод 785 мянган тээврийн хэрэгсэл бүртгэгдсэн. Энэ нь нийслэлд байгаа машины тоо 55 мянгаар хэтэрсэн үзүүлэлт юм.Улаанбаатар хотын түгжрэл, агаарын бохирдол, зам тээврийн ослын тоог бууруулах зорилготой Улаанбаатар хотын нийтийн тээврийн улсын бүртгэлийн дугаарын дээд хязгаарыг тогтоох шийдвэр 11-р сарын 8-наас хэрэгжиж эхэлнэ гэж Нийслэлийн Засаг даргы орлогч Т.Даваадалай мэдээлсэн билээ.