Олон улсын ерөнхий арбитирч Марк Лалондэ тэргүүтэй шүүгчид өнгөрсөн оны тавдугаар сараас “Алтандорнод Монгол” компанийн захирал С.В.Паушокийн нэхэмжлэлийг ХБНГУ-ын Франкфурт хотноо хэлэлцэж эхэлсэн. Тэгвэл Монголын Засгийн газар сөргүүлээд С.В.Паушокоос нэлээд юм нэхэмжлээд байгаа юм. Үүнд, Гэнэтийн ашгийн татварт төлөх ёстой 56 тэрбум төгрөг, байгаль орчин сүйтгэсний нөхөн төлбөр, Ашигт малтмалын тухай хууль зөрчсөний торгууль гэх мэт олон төрлийн төлбөр багтжээ. Жил гаруй үргэлжилж буй энэхүү маргааныг шийдвэрлүүлэхийн тулд манай улс таван тэрбум төгрөг зарцуулаад байна.
Арбитрчид зөвхөн хэн нь буруутай вэ гэдгийг тогтооно. Дараа нь буруутай этгээд нь нөгөө талынхаа нэхэмжилсэн мөнгийг гаргаж өгөх юм. Хэрвээ “Алтандорнод Монгол” ялагдвал манайх дээрх нэхэмжилсэн мөнгөө авах ба ялагдвал нэг сая ам.долларын өрд унах юм. Арбитрчид зөвхөн хэн нь буруутай вэ гэдгийг тогтооно. Дараа нь буруутай этгээд нь нөгөө талынхаа нэхэмжилсэн мөнгийг гаргаж өгөх юм. Хэрвээ “Алтандорнод Монгол” ялагдвал манайх дээрх нэхэмжилсэн мөнгөө авах ба ялагдвал нэг сая ам.долларын өрд унах юм.
Татвар болон хууль эрх зүйн орчны хувьд Монголыг найдваргүй улс хэмээн дэлхий нийт дүгнэж, зарим хөрөнгө оруулагчид эргэлзээнд орж байсан удаатай. Оюутолгой ордыг ашиглах гэрээ байгуулж, Тавантолгойтой холбоотой асуудал ид өрнөж буй энэ үед Алтандорнод Монгол компанитай холбоотой маргаан тэдний анхаарлыг ихэд татаж буй нь ойлгомжтой. Монголын Засгийн газар ялалт байгуулвал нэг хэрэг, ялагдал хүлээвэл өөр хэрэг үүсч болзошгүй юм.
“Алтандорнод Монгол” ХХК нь ОХУ-ын 100 хувийн хөрөнгө оруулалттай, 1997 онд манай улсад бүртгүүлж, 1999 оноос олборлолтын болон хайгуулын ажиллагаа явуулж эхэлжээ. www.iltod.mn сайтад мэдээлснээр 2000-2006 оны хооронд байгаль орчин нөхөн сэргээхэд ердөө зургаахан сая төгрөг зарцуулж байсан тус компанийн тухай товчхон мэдээллийг хүргэе. 2000-2005 онд нийт 18 тонн цэвэр алт олборлож, үүнийгээ 206 сая ам.доллараар борлуулжээ. Тухайн үед олборлосон алтны хэмжээгээрээ “Бороо гоулд”-ын дараа хоёрдугаарт бичигдэж байсан байна. Анх Ар наймган нэртэй хайгуулын болон олборлолтын хоёр лиценз эзэмшиж байсан бол 2007 оны байдлаар энэ тоо 99-т хүрчээ. Тэдний харьяалал дахь лицензүүдийг авахад нийт нийт 17 сая ам.доллар зарцуулсан гэжээ. Төв аймгийн Заамар, Архангай аймгийн Цэнхэр зэрэг сумдад алт олборлодог, тэрчлэн Дархан-Уул аймгийн Хонгор, Шарын гол, Өвөрхангайн Нарийнтээл, Сэлэнгийн Ерөө зэрэг сумдын нутагт лиценз эзэмшдэг. 1999-2006 оны хооронд нийт 35 сая ам.долларын татвар, хураамжийг улсын төсөвт төлжээ. 2006 онд алтны долоон ордыг нэгтгэсэн Ар наймган, Баянгол, Туул дэнж, Өлзийт тээл гэсэн дөрвөн уурхай ажиллуулах болсон байна.
Татвартай холбоотой асуудлаар Алтандорнод Монгол компани дотоодод ч зарга үүсгэж, захиргааны хэргийн шүүхэд нэхэмжлэл гаргасныг оны эхэнд шийдэж байжээ. Паушок Үндэсний Татварын Ерөнхий газарт хаягласан зарга шат шатны шүүхээр давсаар эцсийн шатны шүүх шийдвэрээ гаргахад хэдий ялалт байгуулсан ч гомдолтой үлдсэн гэх. ҮТЕГ-ын Улсын төсвийн орлогын хяналтын газрын татварын улсын байцаагч нар “Алтандорнод Монгол” компанийн 2006, 2007 оны татвар төлөвлөлтийн байдлыг шалгаж зөрчил илрүүлж актыг гаргаж байжээ. Тухайлбал, 44 тэрбум 620 сая гаруй төгрөгийн зөрчилтэй холбоотой нөхөн татвар, торгууль тавьсныг Паушок эсэргүүцсэнээр зарга үүсч байжээ. Улсын Дээд шүүхийн Захиргааны хэргийн танхим дээрх хэргийг өнгөрсөн нэгдүгээр сарын 05-нд хянан хэлэлцээд анхан шатны шүүхийн шийдвэрт зарим нэг өөрчлөлтийг оруулсан байна.
Адгийн зарга арав хонодог гэж үг бий. Гэхдээ тэр нэг биш нэлээд хэдэн заргыг 10 хоног байтугай арван жил дамнах асуудал үүсгэж явна. Монголын Засгийн газраас дахин 74 сая ам.доллар нэхэмжлэхээ мэдэгдсэн байна. Зальжин эр Монголд үйл ажиллагаа явуулж байхдаа охин компаниудаараа дамжуулан Японы “Иточү” корпорацаас их хэмжээний мөнгө луйвардсан гэнэ. “Иточу”-гаас тоног төхөөрөмж авахаар тохиролцож, “Анод”, “Зоос” банкуудтай гэрээ хийж, С.В.Паушок ихээхэн хэмжээний мөнгө завшжээ. Үүнийг Монголын хууль хяналтын байгууллага тогтоож, олон улсын арбитрын шүүхэд мэдэгдсэн байгаа ба харин өнөө “Иточу” корпараци нь Монголоос хохирлоо барагдуулах нэхэмжлэл гаргаж, асуудлыг улам ээдрээтэй болгоод байгаа аж.
С.В.Паушок гэж хэн бэ. Тэр ямар мэргэжилтэй нь тодорхойгvй. Хуульч, хурандаа генерал, шинжлэх ухааны доктор, профессор, бvр байчихаад заримдаа академич гэлцэх нь бий гэх. Харин хөдөө аж ахуйн чиглэлийн мэргэжилтэй бололтой. С.В.Паушок Монголд ирэхээсээ өмнө Тажикстан улсад “Памир” алтны артельд ажиллаж байсан. ОХУ-д “Алтан Дорнод-Сибирь” ХХК бүртгүүлж, Буриад Улсын Муйскийн район, Таксимо тосгонд алт олборлох ажлаа эхлүүлсэн. Монголын хууль шүүхийн байгууллагын нөлөө бүхий хүмүүст захидал бичиж дарамталж, Ерөнхийлөгчид хүртэл хэл хүргэсэн. Энд тэндхийн шүүх, хяналтын байгууллагад удаа дараа зарга мэдүүлсэн ба нийслэлийн прокурорт бичсэн албан бичгийн тоо л гэхэд 17 хүрчээ.
Олон улсын шүүхэд Монгол Улстай заргалдаж байгаа орос эрд манай улсын хууль сахиулагчид эрүүгийн хэрэг үүсгэчихсэн, анаж байгаа. Тэрбээр 127 тэрбум төгрөгийн татвараас зайлхийсэн хэргээр гурван жил гаруй шалгуулж байгаа ба түүнд холбогдох хавтаст хэрэгт өнгөрсөн жилээс арилжааны банкаар дамжуулан мөнгө угаасан гэх зүйл анги нэмэгджээ.