Жилийн шилдэг хөлбөмбөгчинд олгодог алтан бөмбөг буюу Баллон д’Орын энэ оны эзэн тодорлоо. Цагтаа Месси, Роналдо хоёр энэ шагналыг бүрэн өмчилж, ээлжилж хүртсээр бусдаасаа хол тасарсан бол сүүлийн жилүүдэд салхи орж, шинэ нэрс дуулдах болов. Энэ жил ч өрсөлдөөн ширүүн байжээ.

Баллон д’Орын шагнал гардуулах ёслол орон нутгийн цагаар Даваа гаригт болсон бөгөөд хэн нь дэлхийн шилдэг болох вэ гэсэн асуулт олны анхаарлыг татаж байлаа. Хэдхэн хоногийн өмнө Испанийн хэвлэлүүд тэр дундаа Реал Мадридыг дэмждэг сонингууд Винисиус Жуниорыг алтан бөмбөгийн эзэн болсон гэх мэдээг цацсан. Угаасаа ч бразил залуу өнгөрсөн улирал тунчиг сайн тоглож, багийнхаа хамтаар УЕФА Аваргуудын лиг, Ла лигт түрүүлсэн билээ.

Гэтэл Ням гаригт нэгэн мэдээлэл гарсан нь Винисиус Жуниор Парисыг зорьж, шагнал гардуулах ёслолд оролцохгүй гэх шуум гарав. Энэ ч утгаараа түүнийг энэ жилийн алтан бөмбөгийн эзэн биш болохыг хөлбөмбөг сонирхогчид ойлгожээ.

Тэгвэл Винисуис Жуниор биш бол хэн бэ? Мэдээж Родри. Испани эрийн тухайд өнгөрсөн улирал Манчестер Ситигийн хамтаар Английн Премьер лигт түрүүлж, Испанийн шигшээ багийнхаа хамтаар Европын аварга болсон амжилттай.

Шагнал гардуулах ёслолын арга хэмжээ эхэлж, ялагчийг зарлахад Родри гэв. Түүний араас Винисиус Жуниор, Жюд Беллинхем нар удаалжээ. Ийнхүү Родри алтан бөмбөгийн эзэн болсон гурав дахь испани хөлбөмбөгчин, анхны Манчестер Ситигийн тоглогч болсон гэнэ. Түүнээс өмнө испаничуудаас Альфредо Ди Стефано (1957, 1959), Луис Суарез (1960) нар хүртэж байжээ.

Дэлхийн шилдэг хөлбөмбөгчин болсон Родри "Миний болон гэр бүл, эх орны минь хувьд онцгой өдөр тохиож байна. Өнөөдрийн ялалт зөвхөн минийх байсангүй. Энэ бол Испанийн хөлбөмбөгийн төлөөх, энэ шагналыг хүртэх ёстой ч хүртэж чадаагүй Иньеста, Шави, Серхио Бускетс тэргүүтэй олон испани тамирчдын төлөөх ялалт байлаа. Үүнийг Испанийн хөлбөмбөг, хагас хамгаалагчдын төлөө зориулж байна" гэлээ.

БУСАД ШАГНАЛЫН ЭЗЭД

Харри Кэйн, Киллиан Мбаппе нар Герд Мюллерын нэрэмжит оны шилдэг довтлогчийн шагналыг хуваан хүртжээ. Тэд хоёулаа өнгөрсөн улирал бүх тэмцээний хүрээнд 52 гоол оруулсан үзүүлэлттэй.

Оны шилдэг клубээр Реал Мадрид тодорч, шилдэг дасгалжуулагч нь Карло Анчелотти болов. Өнгөрсөн улирал Анчелоттигийн Реал Мадрид лигтээ 10 оноо илүү түрүүлж, УЕФА Аваргуудын лигийн 15 дахь цомоо хүртсэн билээ. Тус клубээс нийт долоон тоглогч Баллон д’Орын сүүлийн 25 нэрсэд тунасан.

Шилдэг залуу тамирчинд өгдөг Копа цомын эзнээр маргаангүй Ламине Ямаль тодорчээ. Өнгөрсөн зун 17 нас хүрсэн тэрбээр өнгөрсөн улирал Барсагийн төлөө 50 тоглолтод долоон гоол, долоон гоолын дамжуулалт өгчээ. Мөн Испанийн шигшээ Европын аварга болоход гол үүргийг гүйцэтгэсэн.

Шилдэг хаалгачид өгдөг Яшины цомоор Астон Вилла болон Аргентины шигшээ багийн Эмилиано Мартинез тодров. Тэрбээр хоёр жил дараалан энэхүү шагналыг хүртэж байна. Түүний хувьд энэ шагналыг дараалан хүртсэн анхны хаалгач болж байна.

Баллон д’Орын топ 10

1. Родри – Испани, Манчестер Сити
2. Винисиус Жуниор – Бразил, Реал Мадрид
3. Жюд Беллинхем – Англи, Реал Мадрид
4. Дани Карвахаль – Испани, Реал Мадрид
5. Эрлин Холанд – Норвеги, Манчестер Сити
6. Килиан Мбаппе – Франц, ПСЖ/Реал Мадрид
7. Лаутаро Мартинез – Аргентин, Интер Милан
8. Ламин Ямаль – Испани, Барселона
9. Тони Кроос – Герман, Реал Мадрид
10. Харри Кэйн – Англи, Байерн Мюнхен