Шанхай хотын иргэд аймшгийн баяр тэмдэглэхээр цугласан боловч бүтсэнгүй. Дүрд хувирч хувцаслан цугласан иргэд цагдаа нарын дарамт шахалтаар таржээ. Энэ бол олон нийтийн цугларалт, үзэл бодлоо илэрхийлэх эрх чөлөөг дарах гэсэн эрх баригчдын оролдлого гэж иргэд үзэж байна.

Аймшгийн баяр тэмдэглэж болохгүй гэх зааварчилгаа, мэдэгдэл албан ёсоор ирээгүй. Гэсэн ч цугласан олныг дарангуйлах магадлалтай гэсэн цуу яриа энэ сарын эхнээс л тарж эхэлжээ. Түүнчлэн зарим их дээд сургууль оюутнууддаа баяр тэмдэглэхгүй байх зааварчилгаа өгчээ. Тухайлбал, Фудан их сургуулийн удирдлагууд оюутнууд руу утасдаж, гадагш гарсан эсэх, үйл ажиллагаанд оролцсон эсэхийг нь шалгасан гэв.

Шанхайн иргэд өнгөрсөн жилийн аймшгийн баяраар эрх баригчид болон тэдний бодлогыг шоглосон хувцас өмсч, шуугиан дэгдээж байв. Тодруулбал, иргэд аварга том хяналтын камер, Covid-19-ийн сорил, "Weibo" платформ зэргийг илэрхийлэн хувцасласан юм.

Энэ жилийн тухайд иргэд энгийн комик номын баатруудыг дуурайсан байсан ч цагдаад баривчлагджээ. Тэд цагдаагийн газарт очоод нүүр будалтаа арилгахаас өөр аргагүй болсон тухайгаа цахим сүлжээндээ хуваалцсан байна.