Хятад даяарх хүүхдийн цэцэрлэгийн тоо өнгөрсөн жил таваас илүү хувиар буурчээ. Хүн амын тоо буурч буйг дагалдаад сургуулийн өмнөх боловсролын байгууллагын тоо ч хоёр дахь жилдээ үргэлжлэн буурсан нь энэ юм. Тус улсын Боловсролын яамны мэдээлснээр 2022 онд цэцэрлэгийн тоо 289200 байсан бол 2023 онд 274400 болжээ.

Цэцэрлэгийн тооноос гадна цэцэрлэгт хамрагдах хүүхдийн тоо ч цөөрсөн. 2023 онд 40.9 сая хүүхэд сургуулийн өмнөх боловсрол эзэмшжээ. Энэ нь өмнөх оноос 11 хувиар буурсан үзүүлэлт байв. Цэцэрлэгт хамрагдах хүүхдийн тоо буурсан тул барилга байгууламжуудыг нь настайчуудын асрамжийн төв болгон ашиглах болжээ.

Төрөлт буурч, өндөр настнуудын тоо нэмэгдсээр байгаа нь Хятадын эрх баригчдын толгойны өвчин болоод багагүй хугацаа өнгөрч байна. Эрх баригчид төрөлтийг дэмжихийн тулд янз бүрийн арга хэмжээ авсаар байна. "Нэг өрх нэг хүүхэд" бодлогыг олон жил баримталсан тус улс өдгөө хосуудыг хоёр ба түүнээс дээш хүүхэдтэй болохыг дэмжиж байна. Тухайлбал, өмнөд хэсгийн Гуандон мужийн нэгэн тосгонд хоёр дахь хүүхдэд 10 мянган юань, гурав дахь хүүхдэд 30 мянган юанийн тэтгэмж олгох болжээ. Түүнчлэн 80 сая гаруй хүн амтай Сычуань муж хүүхдийн тоотой холботой бүх хязгаарлалтуудаа цуцалсан байна.

Хятадын хүн амын тоо өнгөрсөн жил 2.08 саяар буурсан бөгөөд энэ нь хоёр дахь жилдээ дараалан буурч буй үзүүлэлт юм. Мөн 1000 хүнд ногдох төрөлтийн хэмжээ 6.39 болсон нь түүхэн доод үзүүлэлт байжээ.