Чөлөөт бөхийн залуучуудын дэлхийн аварга шалгаруулах тэмцээн /ДАШТ/ Албани улсын нийслэл Тирана хотод үргэлжилж байна. Тус тэмцээн аравдугаар сарын 21-27-ны өдрүүдээр 23 хүртэлх насныхны сонгомол, чөлөөт бөхийн ДАШТ явагдах юм.

Тэмцээний эмэгтэйчүүдийн 53 кг-ын жинд Монгол Улсын тамирчин Чинболдын Отгонтуяа хүрэл медаль хүртжээ.

Тэрээр эхний шатанд Энэтхэгийн Хансика Ламбаг 12-2, шөвгийн наймд АНУ-ын Элена Ноэллэ Ивалдиг 10-8 харьцаагаар ялсан. Харин хагас шигшээд Японы Юү Сакамотод 4-4 харьцаагаар ялагдсан бөгөөд улмаар хүрэл медалийн төлөө Казахстаны Зэйнеп Баяановаг 12-2 харьцаагаар хожсон юм. Түүнчлэн 68 кг-д зодоглосон 23 хүртэлх насныхны Азийн аварга Т.Энхжин Киргизийн Нурзат Нуртаеваг 5:4-өөр давсан ч, шигшээ наймд Хятадын Ду Синзед 3:2-оор унав. Хятадын бөх финалдаж чадаагүй тул Т.Энхжин дагаж барилдах боломжгүй болсон юм.

Чинболдын Отгонтуяа нь Азийн АШТ-ээс алт, мөнгө, хүрэл медальтай ба насанд хүрэгчдийн УАШТ-ий алт, Монголын бүх ард түмний спортын наадмын алтан медаль хүртэж байжээ.