Израилийн арми Баасан гаригаас Бямба гаригт шилжих шөнө Ираны эсрэг агаарын цохилтын давалгааг эхлүүлсэн билээ. Агаарын цохилтод Тегераны ойролцоох цэргийн баазууд болон баруун нутгийн Илам муж, Хузестаны баруун өмнөд хэсэгт байрлах объектууд өртжээ. Энэ үеэр хоёр иран цэрэг амиа алджээ. Үүнээс өөрөөр томоохон хэмжээний хохирол учирсан талаар Ираны тал мэдэгдээгүй байна.

Израилийн цохилтыг Хамас бүлэглэл хатуу зэмлэн буруушааж байна. Тус бүлэглэл мэдэгдэл хийхдээ "Энэ халдлага нь Ираны бүрэн эрхт байдлыг бүрэн зөрчиж, бүс нутгийн аюулгүй байдалд чиглэсэн хурцадмал байдал үүсгэлээ. Ираны тал Израилийн дайралтын үр дагаврыг үгүй болгож чадсан" гэв.

Харин Ираны Гадаад хэргийн яам "Израилийн халдлага нь олон улсын хуулийг илэрхий зөрчиж байна. Иран өөрийгөө хамгаалах эрхтэй, үүрэгтэй" гэж мэдэгдээд НҮБ-ын дүрмийн 51 дүгээр зүйлийг дурджээ.

Арабын нэгдсэн Эмират, Саудын Араб, Катар, Египет зэрэг орон мөн Израилийн цохилтыг буруушаасан мэдэгдэл хийлээ.

Тэгвэл нөгөө талд Хезболла бүлэглэл Израильд цохилт өгч байна. Тус бүлэглэл Бямба гаригийн үдээс хойш 80 орчим пуужин харвасныг Израилийн Батлан хамгаалах хүчин мэдэгдлээ. Израилийн хойд хэсгийн Хайфа орчимд таван орон сууцны хороолол пуужингийн цохилтод өртсөн байна.