Украины ерөнхийлөгч Зеленский Лхагва гаригт ээлжит видео мэдэгдлээ хийхдээ өвөрмөц подволк өмссөн байсан нь анхаарал татав. Дайн эхэлснээс хойш Зеленский албан маягийн хувцаснаас татгалзсан бөгөөд цэрэг ногоон цамцаараа алдаршсан.

Энэ удаад тэрбээр байлдааны нөхцөл байдлын талаар ярьсан боловч хэлсэн үгнээс нь илүү өөр зүйлд хүмүүсийн анхаарал төвлөрчээ. Түүний өмссөн хар подволк дээр улаан, цагаан өнгөөр "Make Russia small again" буюу "Оросыг дахин жижигрүүлье" гэж бичсэн байв. Энэ үгээр тэр Курскийн довтолгоог илэрхийлсэн ч байж болох юм. Украины арми өнгөрсөн сард Курск мужид 1200 гаруй км2 талбайг хяналтдаа авсан билээ.

Зеленскийн шинэ подволк дэлхий нийтээс гадна Оросын албаныхны анхаарлыг маш хурдан татжээ. ОХУ-ын Гадаад хэргийн яамны хэвлэлийн төлөөлөгч Мариа Захарова энэ талаар хэлэхдээ "Жижиг гэдэг нь ямар юм бол? ЗХУ шиг үү? Оросын хаант улс шиг үү? Аан, ойлголоо, Киевийн Орос шиг юм байна. Үүний тулд бидэнд Киев хэрэгтэй. Хөгийн амьтан минь чи үүнийг өөрөө хэлсэн шүү" гэжээ. Үүнийг нь тус яам "Х" хаягаараа жиргэсэн байна.

Киевийн Орос гэх нэрийг 19 дүгээр зуунд Оросын түүхчид гаргаж ирснээр энэ үеийг тэмдэглэх болсон. Википедиад тэмдэглэснээр, Смоленск, Киев зэрэг бусад эртний орос хот аймгуудыг бүхэлд нь нэгтгэж 882 онд Киевийн Орос улсыг үүсгэжээ. Энэ нь МЭ 882 оноос 13 дугаар зууны дунд үе хүртэл оршин тогтносон бөгөөд 1237-1241 онуудад болсон Монголын эзэнт гүрний аян дайны үед эзлэгдэж мөхсөн юм. ОХУ өөрсдийгөө Киевийн Орос улсын цорын ганц залгамжлагч гэж эртнээс нааш мэдэгдсээр ирсэн.