Хүн төрөлхтөн 10 мянган жилийн өмнөөс өнөөг хүртэл адууг гэршүүлэн уналга эдэлгээндээ ашиглаж байна. Харин тахь нь гэршээгүй үлдсэн дэлхийн хамгийн сүүлчийн зэрлэг адуу юм. Дээд палеолитын үед хамаарах Франц Улсын өмнөд хэсэгт орших Ласко агуйн сүг зурагний хананд тахийг дүрсэлсэн байдаг нь 15 мянган жилийн тэртээ амьдарч байсныг гэрчилж байна.ОХУ-ын судлаач Николай Пржевальский 1879 онд Монголын говьд тахийг анх олж илрүүлж олон улсад Пржевальскийн адуу нэрээр таниулсан юм. Харамсалтай нь байгалийн болон хүний хүчин зүйлээс хамаарч тоо толгой нь цөөрч устахад хүрсэн бөгөөд хамгийн сүүлд байгальд 1969 онд Монголын нутаг дэвсгэр дээр харагдсан хэмээн тэмдэглэсэн байдаг. Анх 1992 онд Голланд Улсын амьтны хүрээлэнгээс Монголд 15 тахь нутагшуулахаар тээвэрлэн авч ирж байсан түүхтэй.  Монгол Голландын хамтарсан Тахь төслийг хэрэгжүүлсэний үр дүнд нийслэл Улаанбаатар хотоос 95 км зайд орших Төв аймгийн Алтанбулаг, Аргалант, Баянхангай сумдын заагт орших Хустайн байгалийн цогцолборт газарт дэлхийн цор ганц зүйл зэрлэг адуу-тахийг байгальд нь амжилттай сэргээн нутагшуулж тоо толгой нь өнөөдөр 1300 гаруйд хүрчээ. Хустайн нурууны БЦГ-т тахиас гадна цагаан зээр, бор гөрөөс, зэрлэг гахай, аргаль, янгир, монгол тарвага, саарал чоно, евразийн шилүүс, мануул, үнэг, хярс зэрэг 44 зүйлийн хөхтөн амьтан бүртгэгдсэн байна.

ГЭРЭЛ ЗУРГИЙГ Л.ЭНХ-ОРГИЛ.