60 дахь удаагийн АНУ-ын ерөнхийлөгчийн сонгууль болоход ердөө хоёр долоо хоног үлдээд байна. Энэ өдрүүдэд сая сая америкчууд өөрийн биеэр болон шуудангаар урьдчилсан санал хураалтад оролцож байна. Мягмар гаригийн үд дундын байдлаар урьдчилсан санал хураалтад 18 сая гаруй хүн оролцжээ. Цаашид ч энэ тоо тасралтгүй өснө.

2020 онд нийт 150 сая гаруй хүн урьдчилсан санал хураалтад оролцож байв. Тухайн үед Covid-19 цар тахал ид дэгдээд байсан тул олон хүн шуудангаар санал өгсөн. Энэ жилийн тухайд ихэнх хүн биечлэн санал өгөхийг илүүд үзэж байна.

Урьдчилсан санал хураалт чухал хэдий ч эцсийн үр дүнг эндээс таамаглахад хэцүү. Арваннэгдүгээр сарын 5-ны өдөр сонгууль өгсөн хүмүүсийн саналтай нийлүүлж байж эцсийн дүн гарах юм. Мөн гол мужууд болон улс даяар хүн амын тоо өөрчлөгдсөн тул 2020, 2024 оны хооронд нь харьцуулашгүй гэдгийг улс төр судлаач Рональд Браунштейн хэлжээ. Коллежид боловсрол эзэмшсэн цагаан арьст сонгогчид болон Ардчилсан намынхныг дэмжих хандлагатай өнгөт арьстнуудын эзлэх хувь улсын хэмжээнд ойролцоогоор нэг хувиар өссөн байна. Бүгд найрамдах намын ноён нурууг бүрдүүлдэг ажилчин ангийн цагаан арьст сонгогчдын хувь Висконсин, Мичиган мужид буурчээ. Энэ мэт жижиг өөрчлөлтүүд сонгуулийн эцсийн дүнд томоохон нөлөө үзүүлэх магадлалтайг Браунштейн онцолж байна.