Израиль, Хамасын дайнаас болж сүйрсэн Газын зурвасыг сэргээн босгоход 350 жил шаардагдана гэдгийг НҮБ анхаарууллаа. Дэлхийн хоёрдугаар дайнаас хойших хамгийн хөнөөлтэй мөргөлдөөн эхлээд бүтэн жил өнгөрчээ. Энэ хугацаанд Газын зурвас дахь орон сууц, зам, чухал дэд бүтэц бараг бүхэлдээ сүйрэв.

НҮБ-ын сүүлийн тайланд дурдсанаар дайн маргааш дууслаа гэхэд сэргээн босголтод 350 жил шаардагдана. Гэхдээ эдийн засгийн өсөлт 2007-2022 оныхтой дүйцэх буюу дунджаар 0.4 хувийн өсөлттэй байвал дээрх хугацаанд Газын зурвасыг хуучин хэвд нь оруулах юм. Мөн сэргээн босголтыг эхлэхээс өмнө цогцос болон дэлбэрч амжаагүй тэсрэх бөмбөгүүдээр дүүрсэн нурангийг цэвэрлэх шаардлагатай.

350 жил гэдэг асар урт хугацаа. Англи, Нидерланд улсууд тэртээ 1600-аад оны сүүлээр тулалдсан. Газын сэргээн босголтын хугацаатай зүйрлүүлж, төсөөлөн бодвол Англи, Нидерланд улсууд одоо л сэхэл авч байх учиртай юм.

Газын зурваст учирсан хохирлын хэмжээг 18.5 тэрбум ам.доллар гэж Дэлхийн банк энэ оны нэгдүгээр сард тооцоолжээ. Энэ нь өмнөд хилийн Рафах хот тэргүүтэй сүүлийн үед эрчимтэй эвдэрч сүйдсэн бүс нутгуудыг оролцуулаагүй дүн юм. НҮБ өнгөрсөн сард хиймэл дагуул ашиглан үнэлгээ хийхэд Газын зурвас дахь барилга байгууламжийн дөрөвний нэг нь их бага хэмжээгээр эвдэрч сүйдсэн байжээ. Байшин барилгуудыг сэргээн засварлахад 40 жил шаардагдана.

Цэргийн ажиллагаа огт явуулахгүй, бараа бүтээгдэхүүний эргэлт болон хүмүүсийн зорчих хөдөлгөөн чөлөөтэй болж, хөрөнгө оруулалтын хэмжээ өссөөр байвал Газын зурвасын нэг хүнд ногдох дотоодын нийт бүтээгдэхүүний хэмжээ 2050 он гэхэд 2022 оны түвшинд хүрэх юм.