Өмнөд солонгосчуудын 45 хувь нь Ким, Ли, Пак гэсэн овогтой байдаг. Сүүлийн үеийн статистик мэдээ харвал солонгосчуудын тал хувь нь буюу 20 сая гаруй хүн дээрх гурван овогтой байна. Цаашилбал, тэдний 90 орчим хувь нь энэ овгоо хуурамч буюу зохиомол ургийн модноос авсан байдаг. Мөн хүн амын 64 хувь нь 10 ижил овогтой байна.

Ийнхүү бөөн бөөнөөрөө ижил овогтой болсон тул "Сөүлээс ноён Кимийг олно" гэдэг илэрхийлэл ч гарчээ. Ямар нэгэн бүтэшгүй даалгаврын тухай ярихдаа энэ үгийг хэлж, егөөддөг болсон аж.

Солонгос овог анх харахад энгийн мэт санагдаж магадгүй. Ихэнх нь нэг үетэй, цөөн хэдэн нэр дотор эргэлдэнэ. Гэсэн ч нэг овог дотроо нэлээн хэдэн дэд салбартай байдаг. Тодруулбал, Солонгост 288 овог байдаг ч эдгээр нь 4000 гаруй салбарлана. Тиймээс Ким овогтой хүн болгон хоорондоо төрөл садан гэсэн үг биш юм. Газар зүй болон өвөг дээдэс удам угсаагаараа тэдгээр овог хоорондоо ялгарна.

Орчин цагт гэр бүлийн бүртгэл буюу ургийн мод хөтөлдөг айлууд харьцангуй олон болжээ. Гэвч энэ ургийн мод үнэн зөв эсэх нь эргэлзээтэй байдаг. Яагаад гэвэл Солонгосын хойгийн 5000 жилийн түүхийн ихэнх хугацаанд ихэнх хүмүүс овог нэргүй амьдарч байжээ. Эрт дээр үед зөвхөн хаад язгууртнууд л овог нэртэй байсныг түүхчид өгүүлдэг. Гүрёогийн эрин буюу 918-1392 оны үеэс хүн амын дунд овог нэрийг шүүж эхэлжээ. Харин Чусоны эрин буюу 1392–1910 оны үеэс айлууд ургийн модтой болж эхэлсэн. Энэ үед хүмүүс нэр хүндтэй овог аймаг, бүс нутгаас гаралтай болохын тулд бусад айлын овогт нэрээ багтааж эхэлжээ. Өөрөөр хэлбэл, энэ үеэс зохиомол ургийн мод эхэлсэн гэдэг.

Хүн амын тооллогын бүртгэлээс харахад овог нэргүй өрхүүдийн хувь 1681 онд 45 хувь байсан бол 1816 онд зургаан хувь болж буурчээ.