Монголын Урчуудын эвлэлээс зохион байгуулдаг “Өмнийн сайхан говиор” арт төслийн үзэсгэлэн 2024 оны аравдугаар сарын 25-нд "Монгол арт" галерейд 15.00 цагаас нээлтээ хийх гэж байна. Өмнөговь аймгийн байгалийн үзэсгэлэнт газрууд болон ан амьтад, ахуй амьдралыг Монголын шилдэг зураач уран бүтээлчдээр дамжуулан

• Урлагийн бүтээлд мөнхлөн үлдээх
• Байгалийн үзэсгэлэнт газруудаа хайрлан хамгаалах үзлийг нийгэмд таниулах
• Улс орны хэмжээнд болон олон улсад таниулан сурталчлах
• Ерөнхий ивээн тэтгэгч, дэмжин ажиллагч компаниудаа сурталчлан алдаршуулах гэсэн эрхэм зорилгын хүрээнд 2019-н оноос жил бүр уламжлал болон зохион байгуулдаг төсөл юм.  

2019-2024 он хүртэл одоогийн байдлаар уг төсөлд идэвхтэй уран бүтээлээ туурвиж буй 100 гаруй зураачид оролцсон байна.

Төслийн хүрээнд Монголын дүрслэх урлагийн сор болсон ахмад, дунд, залуу үеийн зураачид Өмнөговь аймгийн долоон сумын нутгаар, нийт 2600 гаруй километр зам туулан тодорхой маршрутын дагуу аялан, Өмнөговь аймгийн байгалийн үзэсгэлэнт газруудыг уран бүтээлд мөнхлөн үлдээж, аялалын дараа туурвисан уран бүтээлүүдээрээ хамтарсан үзэсгэлэн гарган олон нийтэд толилуулдаг аж.

Мөн "Монгол арт" галерейн гурван давхарт энэ сарын 25-нд уран сийлбэрчдийн "Өв" үзэсгэлэнг олны хүртээл болгож байна. Монголын урчуудын эвлэлийн гишүүн, Дүрслэх урлагийн академийн уран сийлбэрийн багш, сийлбэрч Ч.Эрдэнэбилэг болон "Шинэ өглөө" нийгэмлэгийн гишүүн, Дүрслэх урлагийн академийн уран сийлбэрийн багш, зураач, сийлбэрч С.Цэнгэл нарын 2009-2021 оны элсэлтийн төгсөгч, шавь нарын хамтарсан "Өв"үзэсгэлэнг аравдугаар сарын 25-наас 30-ны өдрүүдэд дэлгэж, олны хүртээл болно.

• Үзэсгэлэнгийн нээлт: 2024 оны 10 сарын 25, 16:00
• Дэлгэрэнгүй мэдээлэл авах: 9971-1010, 9171-0999

"Өв" уран сийлбэрчдийн хамтарсан үзэсгэлэнгээр Ч.Эрдэнэбилэг болон С.Цэнгэл болон 23 шавь нарын 30 гаруй бүтээлийг үзэх боломжтой.