Жолоочийн хариуцлагын даатгал нь бүдүүлэг, соёлгүй жолооч нарын толгойг илсэн нөхцөл байдалтай байна гэж УИХ-ын гишүүн Г.Лувсанжамц өнөөдөр/2024.10.22/ мэдэгдлээ. Энэ талаар тэрбээр “Жолоочийн даатгалын тогтолцоог харахад хураамжийн орлого нь 13.7 хувь атал нөхөн төлбөр дэрээ 34.3 хувь болж хоёр дахин их болж байгаа. Монголын жолоочийн хариуцлагын даатгал бол хамгийн соёлгүй, бүдүүлэг, зарчимгүй жолооч нарын толгойг илсэн нөхцөл байдалтай байгаа. Тиймээс хариуцлагатай жолооч нарыг урамшуулаад Жолоочийн хариуцлагын даатгал нь хөнгөлөлттэй ч байдаг юм уу,  харин зөрчил их гаргадаг, тавих ёсгүй газар автомашинаа байршуулдаг дүрэм зөрчдөг жолооч нараас их хураамж авдаг татвар татаасын уялдсан тогтолцоог хэрэгжүүлэх шаардлагатай” гэдэг санал дэвшүүлээд байна.

УИХ-ын дарга Д.Амарбаясгалан тэргүүтэй гишүүд өнөөдөр Санхүүгийн зохицуулах хороонд ажиллаж,  үйл ажиллагаатай нь танилцан, хууль, эрх зүйн шинэчлэлийн талаар санал солилцох үеэр Г.Лувасанжамц гишүүн дээрх саналыг гаргасан юм.

Улаанбаатар хотод хүн амын нягтаршил нэмэгдэхийн хэрээр тээврийн хэрэгслийн тоо өсч буй. Тэр хэрээр автомашины түгжрэлтэй өдөр бүр шахам нүүр тулах болсон. Түгжрэл үүсгэж буй нэг шалтгаан нь дүрэмгүй жолооч нарын дураараа авирладаг байдал нөлөөлж байгааг тээврийн цагдаагийнхан сануулдаг.

Дүрмээрээ хөдөлгөөнд оролцдогүй жолооч нарт торгууль тавьдаг ч төлдөггүй нэг зовлон бий. Зарим жолоочид оноосон торгуулийн хэмжээ 8 сая төгрөг даваад байгааг ч Тээврийн цагдаагийн газраас мэдэгдсэн удаатай.

Мөн Улаанбаатар хотын захирагч Х.Нямбаатар торгуулиа төлдөггүй жолооч нарыг хөдөлгөөнд оролцох эрхийг хязгаарлах арга хэмжээг авна гэдгээ мэдэгдсэн ч өнөөдрийг хүртэл хэрэгжүүлээгүй байгаа. Ер нь бол хариуцлаггүй жолооч нарт хүлээлгэх хариуцлагыг чангатгах шаардлага байгааг олон нийтийн зүгээс ч шаардаж ирсэн. Тэгвэл Жолоочийн хариуцлагын даатгалаар нь дамжуулан дүрэмгүй жолооч нарт оногдуулах хураамжийг өндөр тавьдаг байх зэрэг зохицуулалтын асуудал яригдаж эхэллээ.

Г.ХОРОЛ