УИХ-ын Төрийн байгуулалтын байнгын хорооны өнөөдрийн /2024.10.22/ хуралдаан үргэлжилж байна. Тус хуралдаанаар Монгол Улсын 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслүүдийн хоёр дахь удаагийн хэлэлцүүлгийг хийж санал, дүгнэлтээ Төсвийн байнгын хороонд хүргүүлэх юм.

Тэгвэл УИХ-ын гишүүн О.Цогтгэрэл "Төрийн байгуулалтын байнгын хороонд хамаарах байгууллагуудын төсвийг аваад үзэхээр ойролцоогоор Ерөнхий сайдын төсөв 50 тэрбумаар, Ерөнхийлөгчийн тамгын газрын даргынх 10 тэрбумаар, УИХ-ын даргынх 50 тэрбумаар, ЗГХЭГ-ынх 120 тэрбум төгрөг, Шадар сайдынх 50 тэрбум төгрөгөөр, Төрийн албаны зөвлөлийнх 14 тэрбум төгрөгөөр нэмэгдсэн байна. Өөрөөр хэлбэл, Төрийн байгуулалтын байнгын хороонд хамаарах 11 байгууллагын төсөв 2024 оны төсөвт наймдугаар сард оруулсан тодотголоор хамгийн багадаа 20-30 хувиар өссөн байна. Монгол Улсын эдийн засаг үнэхээр ийм сайн байгаад мөнгө нь  багтаж, шингэхээ болчихоод төсөв, төлөвлөгөөгөө нэмээд байна уу. Монгол Улсын 2023 оны гүйцэтгэлээр Монгол Улсын төлбөрийн тэнцэл 600 гаруй сая долларын ашигтай гарч байсан.

Үүнийг дагаад валютын нөөц нэмэгдэж, ханш тогтворжиж байсан. Гэтэл 2024 оны есдүгээр сарын байдлаар 260 гаруй сая ам.долларын  алдагдалтай гарсан.

Үүнийг дагаад ГВАН-ийн хэмжээ буурч, ам.долларын ханш чангарч, төгрөгийн ханш суларч байна. Бодит байдал дээр эдийн засаг ердөө ч сайн биш байна. Нүүрсний үнэ жилийн дотор 30 хувиар унасан, валютын ханш хүндрэлтэй болж, тэнцэл алдагдалтай гарсан байхад дарга нарын, төрийн төсөв 20-30 хувь өссөн байна. Үүний цаана ямар боломж, бололцоо байна гэж төсвөө ингэж таамаглаад байна вэ. Гол худалдан авагч талын эдийн засаг таатай биш, гол худалдаа болох металургтай холбоотой түүхий эдийн үнэ таатай бус байхад юунд итгэж найдаад ийм өндөр төсөв оруулж ирж байна вэ. Энэ хэр үндэслэлтэй тооцоо вэ. Хэт өөдрөг, улс төрийн зорилготой төсвөө эргэж харах шаардлагатай" гэв.