ОХУ-ын эрх баригчид энэ оны тавдугаар сард реппер “Oxxxymiron” буюу Мирон Федоровыг баривчлах тушаал гаргасан. Түүнийг гадаадын агент гэж ОХУ-ын Хууль зүйн яам 2022 оны аравдугаар сард зарласан юм.

“Oxxxymiron” дайны эсрэг зоригтойгоор дуугараад зогсохгүй Украины дүрвэгсдэд зориулж хандивын тоглолт зохион байгуулжээ. Тэрбээр тоглолтынхоо талаар тайлбарлахдаа “Дайнтай санал нийлэхгүй байгаа хэдэн арван сая орос хүн бий. Тийм учраас үүнийг аль болох чангаар хэлэх хэрэгтэй гэж би бодож байна” гэжээ.

Оросын урлагийн салбарынхан карьерт нь нөлөөлөх үр дагавраас айж дуугүй байхыг сонгосон. Гэвч Оросын хип хопчидоос хамгийн зоригтой эсэргүүцлийн дуу хоолой сонсогдсоор байна. Гэвч Иван Дрёмин, “Noize MC”, Моргенштерн зэрэг хэд хэдэн репперийг гадаадын агент гэж зарласан. Иван Дрёмин дайныг ил тод эсэргүүцсэн бол “Noize MC” Европын орнуудаар аялан тоглолт хийхдээ Украинд хандив цуглуулжээ. Харин Моргенштерн “Оросын генералууд цэргийн алба хаагчдыг үхэл рүү нь илгээж байна” гэсэн агуулгатай дуунууд гаргасан тул гадаадын агент гэж нэрлэгдсэн. Улмаар Моргенштерн эх орноосоо дүрвэхэд хүрчээ.

Одоогоос 25 жилийн өмнө дэлхийн хамгийн том дуу бичлэгийн компани “Universal Music” Орост нээгдэж байв. Энэ үеэс эхлэн орос залуус төрөл бүрийн урсгалын хөгжимтэй танилцжээ. Тэр дундаа Оросын репийг үндэслэгч Детзл эндээс төрөн гарсан байна. Реп хип хоп хөгжим ОХУ-д алдар хүндээ өсгөсөөр, өдгөө дайны цаг үед ч залуусын сонсдог хөгжим хэвээр байна.

СУРТАЛ УХУУЛГЫН ХЭРЭГСЭЛ

Кремлийн Украин дахь түрэмгийлэл эхэлснээр олон сая орос эрэгтэй гадаад руу дүрвэж, эсвэл дотооддоо нуугдсан. Дайны талбарт хүн хүчний хомсдолд орсон ОХУ цэрэг татлагын насыг 27-30 болгон нэмэгдүүлэх, шоронгийн хоригдлуудад цалин амлан тулалдуулах зэрэг янз бүрийн арга хэмжээ авсан. Цаашилбал, Энэтхэг, Төв Африк зэрэг гадаадын улсаас цэрэг элсүүлж, нөөцийн цэргүүдийн насыг ч нэмэгдүүлжээ.

Үндсэндээ дайнд явах хүсэлтэй залуус олдохгүй байгаа нь суртал ухуулагчдын тэвчээрийг барж байна. Эх орноосоо дүрвэсэн эрчүүдийн зарим нь буцаж ирсэн ч гэлээ армид элсээгүй.

Залуус барууны хөгжим, соёлын нөлөөгөөр өөрсдийн өвөрмөц байдлаа алдсан гэж Оросын нэрт кино найруулагч, суртал ухуулагч Каран Шахназоров үзэж байна. Шахназаров бол Соёлын яамны ивээн тэтгэсэн эх оронч киног бүтээдэг домогт Мосфильм студийн тэргүүн юм.

Барууны соёл Оросын залуучуудад ямар хор хөнөөл учруулж байгааг засгийн газар ч илэн далангүй ярьдаг. Тухайлбал, Оросын Гадаад хэргийн яамны Дипломат академийн проректор Олег Карповович “Барууны суртал ухуулгад нухчин дарагдсан залуу үеийнхэнд чиглэсэн ажлыг эрчимжүүлэх нь чухал” гэжээ.

Энэ мэтчилэн Оросын суртал ухуулагчид залуусын аливаа асуудалд барууныхныг, тэр дундаа Холливудын киног буруутгах нь элбэг.

Гэвч Кремлийн айх ёстой гол зүйл бол эрх баригчдын эсрэг залуусыг нэгтгэх хип хоп хүч юм. Хип хоп урсгалыг хөгжмийн төрөл гэхээсээ илүү амьдралын хэв маяг гэдэг. Цаашилбал, залуус юу бодож сэтгэж явааг төр засгаас илүүтэй репперүүд сайн мэддэг.

Оросын алдартай рэппер Птаха буюу Давид Нуриев “Би залуустай үргэлж харьцдаг. Гэвч оросууд Украинд юу хийгээд байгааг ойлгодог хүн асар цөөхөн байдаг. Яагаад гэвэл украинчууд манай хилийг даваагүй шүү дээ” гэжээ.

“Moscow times” хуудаснаа бичсэнээр хип хоп хөгжим бол суртал ухуулгын эсрэг төгс эм. Хип хоп хөгжмийн үндэс суурь нь бодит үнэн учир Кремлийн худал хуурмагийг эвдэж чадна. Орос залуус суртал ухуулагчдаас илүү репперүүдэд итгэж байна.

Путины хамгийн их эмээж байгаа зүйл бол Оросын залуучууд өөрчлөлтийн төлөө нэгдэж байгаа явдал аж. Тэрбээр 2018 онд Санкт Петербургт болсон Соёл урлагийн зөвлөлийн үеэр үг хэлэхдээ “Реп гэх мэт орчин үеийн урлагийн төрлүүд нь секс, хар тамхи, эсэргүүцэл гэсэн тулгын гурван чулуутай. Би хар тамхинд хамгийн их санаа зовдог. Энэ бол үндэстнийг доройтуулах зам” гэжээ.

Энэ мэдэгдлийг харвал репперүүдийг сүүлийн үед онилсонд гайхах зүйл үгүй аж.

“Public Enemy” хамтлагийн дуучин Чак Д саяхан өгсөн ярилцлагадаа “Хип хоп урсгал бидний эв нэгдлийг шингээдэг. Соёл гэдэг бол хүн төрөлхтөнийг ойртуулдаг зүйл” гэжээ. Мөн реп хөгжим дэлхий ертөнцийг өөрчилж, Оросыг аварч чадна гэдэгт тэр итгэдэг.