Намар, өвлийн саруудад халтиргаа гулгаанаас шалтгаалсан бэртэл гэмтэл болоод өвчлөл бусад саруудаас эрс нэмэгддэг. Энэ жил өнгөрсөн онуудтай харьцуулахад нийслэлийн зам талбайн халтиргаа их байгааг иргэд шүүмжилж буй. учир нь албаныхан ажлаа сайн хийж, давс бодисоо хангалттай цацаж байгаа хэдий ч иргэд халтирч унаснаас хүнд, хөнгөн бэртэж гэмтэл согог судлалын үндэсний төвөөс яаралтай тусламж авч байгаа юм.

ГССҮТ-өөс өгч байгаа мэдээллээр, аравдугаар сарын 20-ны өдөр Гэмтэл согог судлалын үндэсний төв болон салбар эмнэлгийн Яаралтай тусламжийн тасагт нийт 86 хүн тусламж үйлчилгээ авчээ.

Тухайлбал эрэгтэй 37, эмэгтэй 49, 0-18 насны хүүхэд 13 ирсэн байна.

Түүнчлэн тусламж үйлчилгээ авах иргэдийн тоо цаашид нэмэгдэх хандлагатай байгаа гэдгийг хэллээ. Халтирч унах бэртэл гэмтлийн дийлэнх хувь нь гавал тархи, гар сарвуу, тохой, шуу, хөлийн шилбэ, өвдөг, хүзүү нуруу, аарцаг ясны гэмтэл байдаг аж.

Энэ онд явган хүний замыг шинэчилж, нийтийн эзэмшлийн зам талбайг засаж янзлахад 45.6 тэрбум төгрөг зарцуулахаар болсон. Хэрэв гүйцэтгэгч компани шалгарчихвал ажил эхэлнэ гэдгийг албаныхан хэлсэн юм. Нийслэлд 66 мянган мкв гантиг чулуун зам байснаас жил бүр барзгар чулуун хавтангаар сольж янзалсны хүчинд одоогийн байдлаар 30 орчим мянган мкв гантиг чулуун зам байгаа аж. Тухайлбал, Арслантай гүүр, Сүхбаатарын талбай, Улаанбаатар галерей, МУИС зэрэг хамгийн их хүн зорчдог газруудад цас хялмаалах төдийд хүндрэл үүсдэг. Өнгөрсөн онд явган хүн зорчиход эрсдэлтэй нийт 84 байршлын налуу хэсгийг барзгар хавтангаар сольж янзалсан байна. Энэ жилийн хувьд халтирдаг замуудыг шинэчлэх ажил хараахан эхлээгүй байгаа юм.