Иргэний зориг ногоон нам (ИЗНН)-ын Үндэсний хорооны хурал өчигдөр (2024.10.20) болж, дэд дарга нараа чөлөөлсөн төдийгүй УИХ-ын гишүүн М.Нарантуяаг намын нэр хүндийг унагаж байгаа үндэслэлээр хөөх санал гаргажээ.

Энэ талаар УИХ-ын гишүүн М.Нарантуяа “УИХ-ын чуулгандаа суудаггүй гишүүдийн талаар шүгэл үлээхдээ дунд нь намын дарга М.Батбаатарыг хавчуулаад хэлсэн биш намын ээлжит бус Үндэсний хорооны хурлыг амралтын өдөр зарлан хуралдуулж, дэд даргаас буулгалаа. Ганцхан намайг дэд даргаас буулгахаар муухай харагдана гэж бодсон бололтой, бүх дэд дарга нарыг чөлөөллөө. Үндэсний хорооны хуралд би оролцож, ирц 50 хувьд хүрэхгүй байгааг хэлсэн.

Үндэсний хорооны хуралд Б.Батбаатар дарга таны төрсөн ах Б.Батцэнгэл, төрсөн дүү Б.Батухяг, Б. Батхүү нар сууж байна. Энэ янзаар бол хуралд ах дүү хамаатан садан, найз нөхөд,  албан хаагчид нь орж ирсэн байхыг үгүйсгэхгүй.

Нэг хүний нам болж байгаа юм байна, бүх түвшинд дүрмээ зөрчиж байна. Гаргасан шийдвэрүүд хүчин төгөлдөр биш шүү” гэдгийг хэлээд гарсан. Миний араас бас намайг дэмжиж байсан шударга гишүүд гарч ирсэн байна лээ.

Энэ нам маш олон хүнээ алдаж байгаа, зөрөөд маш олон хүн орж ирж байгаа. Ямар ашиг сонирхолтой хүмүүс орж ирж байгааг би мэдэхгүй. Мөн намайг ИЗНН –ын нэр хүндийг гутааж байгаа гэж үзэн, хөөх санал хүртэл гаргасан байна лээ” гэв.

УИХ-ын гишүүн М.Нарантуяа нь энэ сарын 17-нд чуулганы нэгдсэн хуралдаанд оролцох үеэрээ ИЗНН-ын дарга Б.Батбаатар тэргүүтэй гишүүд хурууны хээгээ уншуулж, ирцэнд орчихоод чуулганы хуралдаандаа суухгүй байгаа тул тасалснаар бүртгэх шаардлагатай гэдэг санал гаргаж байсан юм. Энэ талаар тэрбээр “Чуулганы ирц дээр үг хэлэхгүй бол болохгүй нь дарга аа. Аргатай зальтай хэд хэдэн гишүүн байна.

Хурууны хээгээ уншуулчихаад гараад явдаг, бүтэн өдөржин хуралдаа орж ирдэггүй. Үг хэлэх болохоор орж ирж, попорчихоод гараад явдаг. Энэ хүмүүс өнөөдөр parliament.mn дээр ирцэнд орчихсон, бүртгэлтэй байгаа хэрнээ энэ танхимд суугаад иргэдээ төлөөлөх ажлаа хийхгүй байна.

Энэ бол зөвхөн өнөөдрийн асуудал биш. Өнгөрсөн долоо хоногийн хоёр өдрийн хуралдаан дээр ч ирцээ бүртгүүлчихээд гараад явсан. УИХ-ын ээлжит бус чуулганаар ч тийм л байсан. Би бүгдийг нь ажиглаад байгаа. Би Ёс зүйн хороогоор орсон учраас шаралхаад ажиглаад байгаа юм биш. Ер нь бид яах гэж ийшээ орж ирсэн юм, иргэдээ төлөөлөх гэж орж ирсэн. Иргэдээ төлөөлөхийн тулд бусдынхаа асуултыг сонсоод яам, агентлагийн удирдлагууд ямар хариу өгөөд байна вэ гэдгийг сонсохгүйгээр өөрийнхөө асуултад хариулт сонсчихоод явах юм бол яаж иргэдийг төлөөлөх ажлыг хийх гээд байгааг би үнэхээр гайхаж байна.

УИХ-аас иргэн төвтэй парламент бий болгоно гээд маш их цаг наргүй судалгаа, хэлэлцүүлэг, уулзалт хийгээд яваад байдаг. Гэтэл би төвтэй хэдэн гишүүн нь хуруугаа уншуулчихаад гараад явчихдаг байдлыг юу гэж ойлгох вэ. МАН, Ардчилсан нам ХҮН нам эвслийн Засгийн газар  байгуулаад эвссэн.

Сөрөг хүчин болж үлдсэн наймхан гишүүнтэй ИЗНН, Үндэсний эвслийн хоёр дарга нар нь хуралдаа суудаггүй, ирцээ бүртгүүлчихээд явчихдаг.

Манай намын дарга Б.Батбаатар байна, би гайхаж байна. Сүүдийн Засгийн газар байгуулна гээд гайхуулаад л байгаа. Энэ дотор юу болж байгааг мэдэхгүй байж, яаж Засгийн газарт хяналт тавих гээд байгаа юм.

Худлаа попроод яваад байдаг. Би бол маш их эргэлзээтэй, маш их бухимдалтай байна. Тийм учраас ирцээ бүртгүүлчихээд нэг цагаар илүү хугацаагаар хуралдаа суудаггүй УИХ-ын гишүүдийг тасалснаар тооцдог болмоор байна гэдэг санал дэвшүүлж байна” гэж мэдэгдсэн билээ. Гэвч намын дарга нь шүүмжлэлийг хүлээн авч чадсангүй, Үндэсний хорооны хурлаа зарлан, М.Нарантуяа гишүүнийг дэд даргаас нь буулгасан төдийгүй намаасаа хөөх асуудал босгож ирсэн нь олон нийтийн эсэргүүцэлтэй тулж буй.

Иргэд “ИЗНН гэж хэн ч танихгүй намыг Нара л олон нийтэд таниулж УИХ-д дөрвөн суудалтай болгосон. М.Нарантуяа ИЗНН-д элсээгүй бол Б.Батбаатар УИХ-ын гишүүн болж чадахааргүй байсан. Эрүүл шүүмжлэл хүлээж авч чаддаггүй хүн нам удирдана гэж юу байдаг юм, Б.Батбаатарыг өрөийг нь огцруулах хэрэгтэй” гэцгээн шуугицгааж байна.

Г.ХОРОЛ