Засгийн газрын түвшинд цахилгааны төлбөрийг 67 хувиар, дулааны үнийг 28 хувиар нэмэх урьдчилсан тооцоолол гарчээ. Өөрөөр хэлбэл, дүн өвлийн цагаар эрчим хүч, дулааны үнээ нэмэх нь нэгэнт тодорхой болжээ. Харин 67, 28 хувь байх уу эсвэл үүнээс бага, өндөр байх эсэх нь одоогоор тодорхойгүй байна. Ганц үнэн гэвэл сүүлийн 34 жилийн хугацаанд нэмээгүй цахилгаан, дулааны үнийг хамтарсан Засгийн газар нэмэгдүүлэхээр тохирчээ. Эрчим хүчний сайд Б.Чойжилсүрэн “Цахилгаан, дулааны үнийг нэмэхээс өөр гарц байхгүй. Ямар хэмжээнд нэмэх вэ гэдэг тооцооллоо гаргаж буй. Тиймээс Эрчим хүчний зохицуулах хороо ойрын өдрүүдэд эрчим хүч, дулааны үнийг нэмэгдүүлэх талаар Эрчим хүчний хороонд танилцуулга хийнэ. Шаардлагатай тохиолдолд УИХ, Засгийн газарт мэдээлэл хийнэ” гэсэн тайлбарыг өгсөн юм.

Эрчим хүчний салбар яагаад өнөөдрийн энэ их алдагдалд хүрэв. Улстөрчид нь нэр хүнд, амин хувиа, намынхаа нэр хүндийг бодож, дорвитой шийдвэр гаргаж чадаагүй явсаар ирснийг илрэл. Угтаа бол эрчим хүчний хараат, дотоодынхоо хэрэгцэнэг 100 хувь хангаж чадахгүй Монгол Улсын хувьд жил бүрийн үнийн өсөлт, инфляци, зардал, хэрэглээндээ тааруулан үнээ нэмэх, тэр хэрээр алдагдалгүй ажиллах боломж үе үеийн Засгийн газар, эрчим хүчний салбарын сайд нарт байв. Гэвч эрчим хүчний салбараа анхаардаггүй, цаасан дээр буулгасан хэдэн цахилгаан станцуудтайгаа өнөөдөртэй золгож, эрчим хүч, дулааны үнэ нэмэх бодит үнэнтэй тулгарч байна. Жил бүр бага багаар нэмж, иргэдэд дарамтгүйгээр алдагдлаа нөхөөд явах боломж, цаг хугацаа байсан ч улстөрчид өөрсдийн нэр хүнд, амин хувиа хичээж ирснээс ийм нөхцөлд хүрсэн гэхэд буруудахгүй.

Эрчим хүчний салбар өнөөдөр 1.8 их наяд төгрөгийн урт хугацаатай зээллтэй, 539.6 тэрбумын богино хугацааны өр төлбөртэй байна. 280 төгрөгөөр үйлдвэрлэж байгаа цахилгааныг 140 орчим төгрөгөөр иргэн, аж ахуй нэгжид борлуулдаг байна. Айл өрхүүдийн  дулаан 1м2  талбайг 506 төгрөгөөр тооцож борлуулдаг ч бодит өртөг нь 1300 орчим төгрөг байдаг аж.

Жил бүр л эрчим хүчний салбар алдагдалтай байна, үнэ нэмэх ёстойг салбарынхан нь хэлдэг. Дээрээс нь мэргэжилтнүүд эрчим хүчний салбарыг либералчилж, үнэ чөлөөлөх ёстой гэдэг ч бодит байдал дээр ажил хэрэг болохгүй байсаар ирэв. Түүгээр зогсохгүй бид эрчим хүчний станц барина, өргөтгөнө хэмээн төсөв дээрээ хэдэн жил мөнгө тавьж, цаасан дээрх хэдэн станцтай л үлдэж байгаа нь бодит үнэн.

Хамгийн чухал нь үе үеийн Засгийн газар, Эрчим хүчний сайд, эрх барьж байсан нам нь үнэ нэмэхээс үхтлээ айж, сонгогчдоос оноо авч чадахгүй, дахин сонгогдож чадахгүй байх гэсэн амин хувиа хичээсэн улс төрийн “золиос” нь өнөөдөр иргэд болж байна. Мэдээж, эрчим хүч, дулааны үнэ нэмбэл иргэд төлөх нь тодорхой. Хөлдөөд үхчихгүй, харанхуйд лаа бариад суухгүйн тулд бүгд л төлнө. Гагцхүү нэг удаад өндөр хувиар нэмэх бус бага багаар, иргэдэд дарамтгүйгээр нэмэх боломж, цаг хугацаа хангалттай байсан гэдгийг энд тодотгоё.

Энэ өвлийн хүйтнээс зутрахгүйхэн шиг давах ганц арга нь үнэ нэмэх гэдгийг Б.Чойжилсүрэн сайд хэлчихсэн. Өнгөрсөн жил сайдын суудлаа аваад “аргална даа” гээд эрчим хүчний хязгаарлалт хийсэн бол энэ жил ч мөн үнэ нэмнэ, дээрээс нь хязгаарлалт хийх гэнэ. Ийм л бодит үнэний амтыг улстөрчид бус иргэд амсах цаг асуй.