АНУ-ын ерөнхийлөгчийн сонгуульд Бүгд найрамдах намаас нэр дэвшиж буй Дональд Трампийг дэмжсэн хүмүүст тэрбумтан Элон Маск бэлэн мөнгө амлав. Тодруулбал, үг хэлэх эрх чөлөө, зэвсэг авч явах эрхийг дэмжсэн өргөдөлд гарын үсэг зурсан, Пенсильвани мужид бүртгэлтэй АНУ-ын сонгогчдод 100 ам.доллар бэлнээр өгнө гэж Маск амлажээ.

Тэрбээр "Х" платформдоо энэ талаар жиргэхдээ "Та хэдийнэ итгэдэг байсан тэр зүйлээ дэмжээд мөнгөтэй болоорой. Миний санал Даваа гаригийн шөнө дунд хүртэл хүчинтэй" гэжээ.

Уг нийтлэлдээ Трампийг дэмждэг "America PAC" цахим хуудасны холбоосыг оруулсан байна. "America PAC" цахим хуудсанд зөвхөн америкчууд л нэвтрэн орох боломжтой.

Элон Маск Пүрэв гаригт Дональд Трампийг дэмжих анхны бие даасан арга хэмжээгээ "America PAC" нэрээр зохион байгуулсан нь энэ юм. Дэлхийн хамгийн баян хүн тэрбээр арга хэмжээнд хүрэлцэн ирсэн оролцогчдод 15 минутын турш үг хэлжээ.