Хамасын удирдагч Яхья Синвар Газын өмнөд хэсэгт Рафах хотод амиа алдсан гэдгийг Израиль Баасан гаригт мэдэгдсэн. Израилийн ерөнхий сайд Беньямин Нетаньяху "Хамасын удирдагчийг хөнөөсөн нь Газын зурвас дахь дайны төгсгөл биш эхлэл боллоо" гэсэн бол АНУ-ын ерөнхийлөгч Жо Байден "Яхья Синварын үхэл нь барьцааныхныг суллаж, дайныг зогсоох боломж" гэв.

Харин Хезболла бүлэг энэ хэргийн дараа "Израилийн эсрэг хийх дайнаа улам өргөжүүлнэ" гэж мэдэгдлээ. Иран ч бас байр сууриа өөрчлөхгүй бөгөөд "Эсэргүүцэл улам хүчирхэгжинэ" гэсэн утгатай мэдэгдлийг хийв.

Өнгөрсөн оны аравдугаар сарын 7-нд эхэлсэн дайн Израиль, Хамасаас Иран, Хезболла, Ливан руу халиад буй.

"Синвар хэлэлцээрээс татгалзаж байсан тул сүүлийн хэдэн долоо хоногт дайныг зогсоох хэлэлцээ хийх боломжгүй байсан. Одоо тэр дайны талбараас арчигдаж, Хамасын удирдагч биш боллоо. Бид энэ боолмжийг атгаад авах хэрэгтэй" гэж АНУ-ын Төрийн департментын төлөөлөгч Мэттью Миллер хэлжээ.