Пакистаны хамгийн олон хүн амтай Пунжаб муж дахь коллежийн хотхонд хүчингийн хэрэг гарсны дараа оюутнууд эсэргүүцлийн жагсаал өдөөгөөд буй. Жагсаал улам даамжрах шинжтэй болсон тул мужийн бүх сургуулийг хаах шийдвэр гаргажээ. Энэ шийдвэр насанд хүрэгчдээс гадна 26 сая орчим хүүхдэд нөлөөлнө.

Эсэргүүцлийн жагсаалын үеэр эд зүйл эвдэн сүйтгэж, галдан шатаасан хэргээр 380 хүн баривчлагджээ. Мөрдөн байцаалтын ажиллагаа үргэлжилсээр байгаа бөгөөд олон нийтийн сүлжээнээс хүмүүсийг хайж олно гэж Равалпинди хотын цагдаагийн ажилтан Сайед Халид Мехмуд Хамдани мэдэгдлээ.

Пунжаб мужийн эмэгтэйчүүдийн коллежийн оюутны хотхонд эмэгтэй оюутан хүчиндүүлсэн хэрэг өнгөрсөн долоо хоногт гарсан. Энэхүү эсэргүүцлийн жагсаал нь Пакистаны оюутнуудын аюулгүй байдал, коллеж дахь эмэгтэйчүүдийн эсрэг хүчирхийлэл, бэлгийн хүчирхийлэл, эрх баригчдад үл итгэх байдлын асуудлыг хөндөв. Гэвч эл хэргийг шалгаж буй мөрдөн байцаалтын баг "Хүчингийн хэрэг илрээгүй, жагсаалын цаад зорилгод эргэлзэж байна" гэж мэдэгджээ. Пунжаб коллежийн Лахор дахь захирал Ариф Чаудри хэвлэлийн бага хурлын үеэр хэлэхдээ "Ийм хэрэг гараагүй. Хэрвээ ийм хэрэг гарсан бол би ажлаа хүлээлгэн өгч, оюутнуудтай хамт жагсана" гэв.