Газын зурвас дахь анхны халдлагаас хэдхэн хоногийн дараа Хамасын удирдагч Яхья Синвар газар доорх хонгилд бүгсэн гэдэг. Тэгвэл Яхья Синвар Газын өмнөд хэсэгт Рафах хотод амиа алдсан гэдгийг Израиль мэдэгдлээ. Хамасынхан байрладаг гэж сэжиглэж буй нэгэн барилга Лхагва гаригт цохилтод өртөхөд Синвар тэргүүтэй гурван албан тушаалтан амиа алджээ.

Синвар 2017 оноос хойш Хамасыг удирджээ. Тэрээр 1962 онд Хан Юнис дэх дүрвэгсдийн хуаранд төрсөн бөгөөд хожим нь Хамас бүлэглэлийн анхны гишүүдийн нэг болсон. Израилийн шоронд олон жил суусан тэрээр тэндээс гарахдаа хоригдож буй Хамасын гишүүдийн удирдагч болж гарч иржээ.

Израилийн ерөнхий сайд Беньямин Нетаньяху "Хамасын удирдагчийг хөнөөсөн нь Газын зурвас дахь дайны төгсгөл биш эхлэл боллоо" гэж мэдэгджээ.

Харин АНУ-ын ерөнхийлөгч Жо Байден "Яхья Синварын үхэл нь барьцааныхныг суллаж, дайныг зогсоох боломж" гэв. Тэрбээр "Энэ өдөр дэлхий дахины хувьд сайн өдөр боллоо. Одоо л урагшлах цаг. Дэлхий дахиныг илүү сайн сайхан болгох чиглэлд явж байгаа эсэхээ нягтлан Газын зурваст гал зогсоох цаг" гэлээ. Тэрбээр Израилийн ерөнхий сайд Беньямин Нетаньяхутай утсаар ярьж, баяр хүргэсэн байна. Мөн энэ агшинг хэрхэн ашиглах тухай хэлэлцжээ.

"Синвар хэлэлцээрээс татгалзаж байсан тул сүүлийн хэдэн долоо хоногт дайныг зогсоох хэлэлцээ хийх боломжгүй байсан. Одоо тэр дайны талбараас арчигдаж, Хамасын удирдагч биш боллоо. Бид энэ боолмжийг атгаад авах хэрэгтэй" гэж АНУ-ын Төрийн департментын төлөөлөгч Мэттью Миллер хэлэв.