Газын зурвасын гудамж талбай нас барагсдын цогцос, эвдэрч сүйдсэн байгууламжууд, өлсөж цангасан хүмүүсээр дүүрэн байна. Бүс нутгийн онцгой байдлын албаны тэргүүн Фарес Афана хэлэхдээ "Газын хойд хэсэгт өлсгөлөн нүүрлэсэн. Хүний амьдралыг төлөөлж болох бүхий л зүйлийг Израилийн хүчин устгаж байна. Өлссөн ноход гудамжинд хэвтэх нас барагсдын цогцсыг идэж байна. Энэ нь нас барагсдыг танихад хүндрэл учруулж байна" гэжээ.

Израилийн арми сүүлийн 12 хоногийн хугацаанд Газын гурван дүүрэгт агаараас болон газраар цохилт өгч байна. Бүслэлтэд өртсөн бүс нутагт олон мянган хүүхэд, жирэмсэн эмэгтэй гацжээ. Жабаля мужаас дор хаяж 50 мянган хүн дүрвэсэн байна. Өдгөө үлдсэн 400 мянган хүн хүчтэй бөмбөгдөлт болон өлсгөлөнтэй нүүр тулж буйг НҮБ-ын Хүмүүнлэгийн хэрэг эрхлэх газар Ням гаригт мэдэгдлээ.

Энэ халдлагаар Хамасын шинэ байрлалыг онилж байгаа гэж Израиль мэдэгдсэн юм.

Израилийн арми хүмүүст өлсөж үхэхээс өөр сонголт үлдээсэнгүй гэж НҮБ буруутгаж байна. НҮБ-ын Палестины дүрвэгсдийн асуудал эрхэлсэн агентлагийн тэргүүн Филипп Лаззарини хэлэхдээ "Хүмүүст нэг бол өлсөж үхэх, нэг бол дүрвэх сонголт байна. Газын зурваст хэрээс хэтэрсэн зүйл дэндүү олон байна. Дайны гэмт хэрэг гэх зүйлээс урьдчилан сэргийлэх боломж бий" гэжээ.

Даваа гаригт Газын зурваст 30 ачааны машин бүхий хоол хүнсийг нэвтрүүлсэн. Хүмүүнлэгийн тусламжийг хорихгүй гэж израильчууд мэдэгдэж байгаа ч хоол хайж ирсэн хүмүүс рүү гал нээсэн хэрэг мөн өдөр гарчээ. Жабаля дахь хүнс түгээх цэгт цохилт өгснөөр дор хаяж 10 хүн нас барж, 40 хүн гэмтэж бэртсэн байна.

Жабаля муж дайнаас өмнө үзэсгэлэнтэй, тайван, аюулгүй газар байсан бол өдгөө үнс нурам, төөрдөг байшин болж хувирчээ.