Украины ерөнхийлөгч Зеленский өнөөдөр улсынхаа парламентад ялалтын төлөвлөгөөгөө хэсэгчлэн танилцуулах гэж байна. Цэрэг, улс төр, дипломат, эдийн засгийн элементүүдийг багтаасан энэхүү төлөвлөгөөг гал зогсоох хэлэлцээрт хүргэх эцсийн арга зам гэж ажиглагчид үзэж байна. Зеленский шинэ төлөвлөгөөгөө АНУ-ын шинэ ерөнхийлөгч тангараг өргөхөөс өмнө хэрэгжүүлэх хүсэлтэй.

Ялалтын төлөвлөгөөнөөсөө хэр ихийг өнөөдөр танилцуулах нь тодорхойгүй. Ерөнхийлөгчийн зөвлөх Сергей Лещенко хэлэхдээ төлөвлөгөөг бүрэн дэлгэнэ гэсэн бол албаны зарим эх сурвалжийн мэдэгдэж буйгаар Зеленский хамгийн эмзэг зүйлсээ задруулахгүй.

Украины ирээдүйг тодорхойлох уг төлөвлөгөөний хэд хэдэн бүрэлдэхүүн хэсэг хэдийнэ ил болсон. Тухайлбал, Украиныг НАТО-гийн гишүүн болгох, барууны алсын тусгалын зэвсгээр Оросын нутаг дэвсгэрийн гүнд цохилт өгөхийг зөвшөөрөх, Украины агаарын болон бусад хамгаалалтыг бэхжүүлэх нөөцөөр хангах, Оросын эсрэг хориг арга хэмжээг эрчимжүүлэх зэрэг багтана. Түүнчлэн өнгөрсөн наймдугаар сард Оросын Курск мужид хийсэн гэнэтийн дайралт ч шинэ төлөвлөгөөний нэг хэсэг байжээ.

Зеленский барууны удирдагчдад өөрийн үзэл баримтлалыг тоймчлон танилцуулж айлчилсан. Гэвч одоогоор ялалтын төлөвлөгөөг дэмжинэ гэдгээ илэрхийлсэн хүн үгүй.