Улаанбаатар хотод такси үйлчилгээ үзүүлэх эрхтэй таван аж ахуйн нэгжид 251 такси бүртгэлтэй байгааг албаныхан мэдээллээ. Энэ талаар Нийтийн тээврийн бодлогын газрын дарга Д.Отгонжаргалаас тодруулахад, "Такси үйлчилгээ эрхлэх MNS 5122 Монгол Улсын стандартыг 2013 онд баталсан. Такси үйлчилгээ гэдэг нь зориулалтын авто зогсоолоос эсвэл дуудлагаар энэ стандартад заасан үйлчилгээг зорчигчдод үзүүлэх тээвэрлэлт гэж заасан байдаг. Тээвэрлэгчид тавигдах шаардлага нь мэргэжлийн боловсон хүчин болон санхүү, эдийн засгийн чадавхтай байх, хууль тогтоомж, стандартад нийцсэн зориулалтын тусгай суудлын автомашинтай байх, тээвэрлэлтийн гэрээ байгуулсан байх гэж заасан.

Тодруулбал, зүүн талдаа жолооны хүрдтэй, 12-оос дээш жилийн насжилтгүй тээврийн хэрэгсэл байна.

Тухайн албан ёсны зөвшөөрөлтэй аж ахуйн нэгж нь татварын өргүй, засвар техникийн тоноглол, дулаан грааж, угаалга хийх газар, жолооч нь дүрэмт хувцастай, машин нь таних тэмдэгтэй байна. Уг нь Авто тээврийн тухай хуулийг 1999 онд баталсан. Уг хуулийг нэг хэсэг хэрэгжүүлээд улсын хэмжээнд 3400 такситай байлаа. Гэтэл албан ёсны такси үйлчилгээ явуулдаг аж ахуйн нэгжүүд буурсаар өнөөдрийн байдлаар "Вип такси сервис" ХХК, "ТБ сервис" ХХК, "Мөнх такси" ХХК, "Стар авто трейд" ХХК, "UB Cab бригад" ХХК гэсэн таван аж ахуйн нэгжийн 251 такси үйлчилж байна. Такси үйлчилгээ явуулах зөвшөөрлийг иргэнд олгохгүй, зөвхөн аж ахуйн нэгжид олгоно. Зөвшөөрөлтэй аж ахуйн нэгжийн такси нийслэлчүүдэд хүртээмжтэй үйлчилж чадахгүй. УИХ-аас Зөвшөөрлийн хуулийн нэмэлт өөрчлөлтэй холбоотойгоор 2023 оны арванхоёрдугаар сарын 7-ны өдөр 170 дугаар тогтоолыг баталсан.

Тогтоолд, цахим платформд бүртгэлтэй зорчигч тээвэрлэж яваа иргэнд энэ зохицуулалт үйлчлэхгүй гэж тусгасан" гэв.

Нийслэлд түгжрэл бууруулах зорилгоор 2024 оны аравдугаар сарын 15-наас эхлэн зөвшөөрөлгүйгээр такси үйлчилгээ эрхэлбэл хувь хүнийг таван сая төгрөг, хуулийн этгээдийг 50 сая төгрөгөөр торгох зохицуулалт хэрэгжиж эхэлсэн. Зөрчлийн хуульд оруулсан энэ зохицуулалт нь аппликэйшн ашиглан такси дуудлагын үйлчилгээ үзүүлдэг бүртгэлтэй жолооч нарт хамаарахгүй гэнэ.