Монголын орчин үеийн хөгжмийн урлагт өөрийн өнгө аяс, дуу хоолой, авьяас билэг, хүч хөдөлмөрөө зориулсан “New Star” студи 20 жилийн ойн “Бүх оддын тоглолт”-ын товоо аравдугаар сарын 18-нд зарласан. Үүнтэй холбоотойгоор "Пентатоник" академийн дөрвөн удаагийн шагналт, Соёлын тэргүүний ажилтан, "New Star" студийн үүсгэн байгуулагч С.Гантөртэй ярилцлаа.

-Хорин жилийн ойн тоглолтоо хийж байгаад баяр хүргэе. Энэ удаагийн тоглолтоо хэзээнээс төлөвлөсөн бэ? 

-“New Star” студи 2004 онд байгуулагдсан. Үүнээс хойш таван жил, арван жилийн ойн тоглолтуудаа хийсэн. Харин одоо удаан хугацааны дараа 20 жилийн ойн тоглолтоо хийх гэж байна. Тоглолтоо өмнө жилээс төлөвлөсөн. Олон түмэнд хүрсэн дуунуудаа сэргээж тоглолт хийе гэж хамт олон, найз нөхөдтэйгөө ярилцаж, төлөвлөснөөр цаг хугацаа нь одоо таарч байна.

-Тоглолтын бэлтгэл хэр хангагдаж байна вэ? 

-Тоглолтын ерөнхий бэлтгэл ажил дууссан. Уран бүтээлчидтэйгээ хамтраад өдөр бүр бэлтгэлээ хийж байна. Амьд хөгжимтэй дуулах уран бүтээлчид цөөнгүй бий. Тэдгээр дуучидтайгаа мөн хамтран бэлтгэлээ хийж байгаа. Бэлтгэл тун давгүй үргэлжилж байна даа.

-Хорин жилийн ойн тоглолтод зориулж, олон хит дууг залуу уран бүтээлчидтэй хамтран шинэчилсэн найруулгаар хүргэж байгаа шүү дээ. Үүнд сонсогчид ямар сэтгэгдэлтэй байна вэ? 

-Ямар ч уран бүтээлийг дахин шинэчилж болно шүү дээ. Саяхан шинэчилсэн хувилбараар цацагдсан дуунууд бүгд тоглолтын сурталчилгаанд зориулагдсан. Үе үеийн төлөөлөл болсон уран бүтээлчдийг сонгосон байгаа. Үүнийг хүмүүс янз янзаар хүлээн авч байна. Мэдээж аль хэдийн хит болчихсон дуунууд учраас анх сонссон мэдрэмжээ авах гэдэг хүмүүс бий. Нөгөө талдаа шинэлэг зүйлд дуртай хүмүүс ч бас бий.

-Тухайн уран бүтээлийг өөр дуучин шинэчилж дуулах гэдэг дээр оюуны өмчийн асуудал бий юу? 

-Оюуны өмч тал дээр эдгээр дуунууд маань бүгд манай студийн бүтээл учир ямар нэгэн асуудал байхгүй. “Бүх оддын тоглолт”-д залуу дуучин Э.Энх-Эрдэнэ “My love” дууг кантри стилээр, дуучин Д.Оюу “My Vision”-ыг Жэйсон, А.Хишигдалай нар “Нууц амраг чинь болъё” жүжгийн дуу “Илчилж амжаагүй хайр”-ыг, Д.Зоригт “Өвлийн дуу”-г, И.Мишээл “Sweet girl”-ыг шинэчилсэн найруулгаар дуулж, сонсогчдын хүртээл болгоно.

-“New Star” студийг үе үеийн олон оддыг төрүүлсэн гэж ярьдаг. Тэр ч утгаараа 20 жилийн ойн тоглолтоо “Бүх оддын тоглолт” гэж нэрлэсэн болов уу?

-Од төрүүлсэн гэж ярих дургүй. Манай студи дээр хамтарч ажилласан дуучдын уран бүтээл олонд хүрсэн гэвэл илүү оновчтой болов уу. Ингээд яривал маш олон уран бүтээлч бий. Одоо ч гэсэн шинээр гарч ирж байгаа уран бүтээлчидтэй хамтарч ажилладаг. Жишээ Л.Балхжав ахын "Өглөө шиг эх орон" дуун дээр хамтдаа ярилцаж байж дуучдаа сонгосон. Том уран бүтээлээс дуучид төрөн гардаг. Тэр утгаараа маш олон уран бүтээлчидтэй хамтарч ажилласан.

–“New Star” студийн хамгийн том төлөөлөл нь дуучин BX шүү дээ. Одоо холбоотой байдаг уу?

-Мэдээж холбоотой байдаг. 20 орчим жилийн өмнө анх Киви хамтлаг бий болсон. Тухайн үед Б.Ангирмаа найз маань охидын хамтлагтай болсон гэдгээ ярьж байсан юм. Тэр үед би ч гэсэн шинэ дуучин гаргах бодолтой явж байгаад BX-тэйгээ таарсан гэж хэлж болно. Бидний хамтдаа хийж байсан уран бүтээлүүд одоо хүртэл амьд байгаад баярладаг. Дүү минь одоо АНУ-д гэр бүлийн хамт ажиллаж, амьдардаг. Энэ удаагийн тоглолтод зориулж мэндчилгээ илгээсэн. Удахгүй хүмүүст хүрэх байх.

-Дуучин BX уран бүтээл хийж байх үед гаргасан бүхий л дуу нь хит болж байсан. Одоо харахад тухайн үе шиг хит дуунууд дахиж төрөхгүй гэж сонсогчид ярьдаг шүү дээ. Энэ юутай холбоотой вэ? 

-Миний бодлоор сошиал хэтэрхий хөгжсөнтэй холбоотой байх. Жишээ нь BX гарч ирж байх үед интернэт гэж бараг л байдаггүй байсан. Хүмүүс фм л сонсдог байлаа шүү дээ. Одоо үед хүмүүсийн хөгжим сонсох хэлбэр нь олон болсон. Шууд гар утсаараа дуртай зүйлээ үзэж, харах боломжтой. Тиймээс хүн болгон нэг зүйл рүү хошуурахгүй байна гэж л харж байна.

-Таныг "Айзам-2" хамтлагийн үүсгэн байгуулагч гэдгээр нь хүмүүс сайн мэднэ. Уран бүтээлч болсон түүхээсээ хуваалцахгүй юу. 20 жил гэдэг урт хугацаа шүү дээ?

-Миний хувьд "Айзам" хамтлагтай салшгүй холбоотой. Анх 1989 онд аравдугаар ангиа төгсөөд Монголын Үйлдвэрчний Соёлын Ордны дэргэдэх “Айзам” хамтлагт  гитарчнаар орж байлаа. 1990 онд "Айзам-2" хамтлагаа байгуулсан. Тухайн үед найзуудтайгаа хамт тав орчим жил хамтлагаараа уран бүтээл хийсэн. 1997 оноос дуучидтай хамтран хөгжмийн найруулга, уран бүтээл хийх ажилд орсон.

Тухайн үед компьютер дээр хөгжмийн найруулга хийдэг хүн цөөхөн байсан. Хөгжмийн студийн хувьд ч анхдагч гэж болно.

2000 онд "Мичид" нэртэй студи байгуулж байсан юм. Үүний дараа 2004 онд н.Энхбаяр гэдэг найзтайгаа, эхнэртэйгээ хамтраад одоогийн "New Star" студийн суурийн тавьсан. Дараа нь техникч н.Ядамсүрэнтэйгээ хамтарсан. Ингээд үндсэндээ 20 жил бид бүхэн энэ студидээ ажиллаж байна. Одоо 20 жилийн ойн баяраа тэмдэглэх гээд сэтгэл хөдлөөд, нойр хүрэхгүй л байна.

Гэрэл зургийг О.Болорсувд