Украины эзлэгдсэн бүс нутагт алга болсон сэтгүүлч Виктория Рощина өнгөрсөн сард Оросын хорих ангид нас барсан гэж албаныхан мэдээлэв. 27 настай Рощина өнгөрсөн оны наймдугаар сард Украины оросуудад эзлэгдсэн бүс нутагт сурвалжлага хийх үеэрээ алга болжээ. Түүний ар гэрийнхэн тухайн цагаас хойш Рощинаг эрэн хайж байсан ч ямар нэгэн мэдээлэл олж чадаагүй юм. Ерөнхий прокурорын газрын мэдээлснээр, Рощина баривчлагдсанаасаа хэдхэн сарын дараа буюу дөрөвдүгээр сард Оросын шоронд шилжсэн байна.

Украины хүний ​​эрхийн комиссар Дмитрий Любинец “Украины сэтгүүлч Виктория Рощина хууль бусаар эрх чөлөөгөө хасуулж нас барсан гэх албан ёсны баримт бичиг Оросын талаас ирсэн" гэж мэдэгджээ.

Энэ талаар Оросын засгийн газар тодорхой мэдээлэл сэтгүүлчдэд өгөөгүй байна. Рощина эзлэгдсэн бүс нутагт очихдоо дайны хөлд нэрвэгдэж буй хүмүүсийн амьдралын талаар сурвалжлах гэж очсон байжээ. Гэсэн хэдий ч түүнийг Оросын эрх баригчид санаатайгаар хөнөөсөн гэж хамтран ажиллагсад нь үзэж байна.

Украины Ерөнхий прокурорын газраас түүний үхлийг дайны гэмт хэрэг, санаатай аллагатай хослуулан шалгаж байгаа гэж мэдэгдэв.

Олзлогдогсдыг эмчлэх, зохицуулах төвийн хэвлэлийн төлөөлөгч Петро Яценко мэдэгдэл хийхдээ Украины 25 орчим сэтгүүлч Орост хоригдож байгаа бөгөөд хэд хэдэн сэтгүүлч сураггүй алга болсон гэжээ. Рощина Олон улсын эмэгтэйчүүдийн хэвлэл мэдээллийн сангаас 2022 оны сэтгүүл зүйн эр зоригийн шагналыг хүртэж байсан. Түүний бүтээл "Украинская правда", "Хромадске", "Чөлөөт Европ" зэрэг олон хэвлэл мэдээллийн хэрэгслээр нийтлэгдэж байсан юм.