Хятад улс өнөөдөр /2024.10.14/ Тайванийг бүслэн хөлөг онгоцуудаа байршуулжээ. Үүнийгээ салан тусгаарлагч хүчинд хатуу сануулга илгээх зорилготой сургууилалт гэж мэдэгдэв. Хятадын энэ үйлдэл нь үндэслэлгүй бөгөөд цааш даамжрах эрсдэлтэйг АНУ анхаарууллаа.

“Joint Sword-2024B” сургуулилалттай холбоотойгоор Тайванийн эргийн бүс нутгуудад өндөржүүлсэн бэлэн байдал зарласан байна. Мөн шаардлагатай тохиолдолд байлдааны ажиллагааны дүрмийн дагуу хариу үйлдэл үзүүлнэ гэж Тайванийн Батлан хамгаалах яам мэдэгджээ.

Сургуулилалтад Хятадын арми, тэнгисийн цэрэг, агаар, пуужингийн хүчин, эргийн хамгаалалт болон бусад хүчин оролцож байна.

Тайвань өндөржүүлсэн бэлэн байдал зарласан ч агаарын тээвэр болон боомтын үйл ажиллагаа хэвийн байгааг Тээврийн яам мэдэгдлээ. Түүнчлэн Тайванийн хамгийн том нисэх буудал Таоюань олон улсын нисэх буудалд ч томоохон саатал гараагүй.

Хятадын төрийн хэвлэлд сургуулилалт болж буй газрыг зургаар харуулжээ. Энд өнөөдрийн сургууилалтын байршлыг улаанаар, тавдугаар сард сургуулилалт хийсэн байршлыг шараар, 2022 оныхыг цэнхэр өнгөөр харуулав.