Өмнөд Солонгос улсын Эрүүл мэнд, нийгмийн хамгааллын яам 13 хүүхэд төрүүлсэн хоёр ээжийг одонгоор шагнав. Тодруулбал, улс төр, эдийн засаг, нийгэм, улс төр, ард түмний сайн сайхны төлөө оруулсан хувь нэмрийг нь үнэлж, 60 настай Иом Гё Сукийг "Соннюү" одонгоор шагнажээ. Энэ нь Өмнөд Солонгосын "Иргэний гавьяаны одон"-ийн тавдугаар зэргийн одон юм. Тэрбээр 1986-2007 оны хооронд таван хүү, найман охин төрүүлжээ. Шагнал гардуулах ёслолын үеэр Иом Гё Сук “20 гаруй жил жирэмслэлт, төрөлтөө давтахад зарим нэг бэрхшээл тулгарсан. Гэхдээ сайн сайхан өсч бойжсон хүүхдүүдийнхээ ачаар би бусдаас илүү аз жаргалтай мөчүүдийг өнгөрөөсөн” гэжээ. Тэрбээр 2011 онд гэр бүлийнхээ түүхийг өгүүлсэн ном хэвлүүлсэн. Уг номдоо хүүхэд төрүүлэх, өсгөж хүмүүжүүлэх тухай онцолжээ.

Одон авсан өөр нэг эх нь 59 настай Ли Ён Ми юм. Ли Ён Ми нь Өмнөд Солонгосын нэрт жүжигчин Нам Бо Рагийн ээж ажээ. Нам Бо Ра ах дүү 13-ынхаа хамгийн бага нь. Ли Ён Ми 23-44 нас хүртлээ 13 хүүхэд төрүүлж, тэднийгээ нийгмийн олон салбарт хувь нэмэртэй хүмүүс болгохын төлөө хүчин зүтгэжээ. Тэрбээр “1980, 2000-аад онтой харьцуулахад хүүхэд төрүүлэх, өсгөж хүмүүжүүлэх чиглэлээр янз бүрийн бодлого баримталдаг болжээ. Гэхдээ эргэн тойрныхноо хараад байхад дутагдалтай зүйл ч олон байна. Бусад хүн юу гэх бол гэж санаа зоволгүйгээр хүүхдээ асрах боломжийг олгодог эрх зүйн орчинг бид дэмжих хэрэгтэй” гэжээ.

Жирэмсэн эмэгтэйчүүдийн эрхийг хамгаалах өдөрт зориулсан арга хэмжээ Өмнөд Солонгост 19 дэх жилдээ зохион байгуулагдсан нь энэ юм. Энэ арга хэмжээнд 150 орчим жирэмсэн эх болон тэдний гэр бүлийнхэн оролцжээ.